لكل بائع ومشتري - من بيتك تقدر تبيع وتشتري من أي محافظة في مصر وحاجتك تجيلك لحد عندك

modynet99 · #1 10-09-2008, 23:55

السلام عليكـ ورحمة الله

شفت حاجة في منتدى البيع وعجبتك لكن لما جيت تشتريها اكتشفت ان صاحبها من الإسكندرية وانت من القاهرة ؟

طب واجتهك مشكلة في توصيل بعض الأغراض لصديق أو قريب في محافظة أخرى ؟؟

إليك الحل السريع والأكيد

نبدأ بسم الله الرحمن الرحيم

العملية كلها يا جماعة ان فيه شركة شحن اسمها Middle East وانا اتعاملت معاها أكتر من 10 مرات في البيع والشراء من ناس بعيدة عني او في محافظات تانية

الشركة دي يا سيدي بتاخد منك الحاجة اللي انت عاوز تبيعها وتوديها للمشتري لحد باب بيته في أي محافظة في مصر

ومع التسليم بتاخد منه المبلغ المتفق عليه
وبعد كده ترجعهولك لحد باب بيتك

كل ما عليك هو انك تتصل بيهم عشان يبعتولك مندوب على مكانك سواء في البيت أو في الشغل وبتقلله انا عاوز اعمل ""شحنة مقابل مبلغ""

وده طبعا نظام آمن جدا
بمعنى ان لو المستلم مادفعش المبلغ ده مش هايسلموه الشحنة وهاترجعلك تاني زي ما هي

طب الكلام ده كله مقابل إيه ؟؟

أسعار الشحن غير ثابتة
فتختلف الاسعار باختلاف
المكان
فاسكندرية غير دمياط غير المنصوره....
كذلك تختلف حسب
الحجم والوزن
فيستطيع اي منا الاتصال بالشركة لتحديد هذه العوامل لمعرفة تكلفة الشحن الاجماليه

يعني مثلا لو انت هاتبيع ماذربورد لواحد في الاسكندرية التكلفة الاجمالية لتوصيل حاجتك للمشتري في الاسكندرية وبعد كده توصيل الفلوس ليك في القاهرة لن تزيد عن 15 جنيه لأن وزن الماذربورد وزنها لن يزيد عن كيلوجرام واحد والمبلغ اكيد اقل من الف جنيه (وبالطبع التكلفة دي مفروض بتبقى على المشتري فانت بتطلب من المندوب تحصيل الرسوم كلها منه)

طب فلنفرض لا قدر الله انه المشتري طلع مش قد كلمته ورفض استلام الشحنة او دفع الفلوس
ففي الحالة دي الشحنة بترجعلك تاني لحد باب بيتك برضه بس ساعتها بقى انت بتدفع تمن شحنها رايح جاي يعني 7 جنيه رايح + 7 جنيه جاي = 14 جنيه

اعتقد المخاطرة مش كبيرة بل وتعتبر معدومة لو الشخص اللي انت هاتبعتله الحاجة ده كان ليه تعاملات كويسة قبل كده مع ناس قبلك أو لو انت شايف انه فعلا عاوز الحاجة وواثق انه هايدفع الفلوس ويستلمها

واعتقد أيضا ان الثقة بين الطرفين لازم تكون موجودة ومتوفرة عشان زي مانت خايف احسن مايرضاش يستلم الشحنة ويلبسك تمن الشحن رايح جاي
فأكيد برضه المشتري بيكون خايف لتبعتله بضاعة بايظة أو حتى كرتونة مليانة طوب بدل الحاجة

إذن فالثقة لازم تكون متوفرة بين البائع والمشتري
ودي بتتم عن طريق تعاملات سابقة أو عن طريق سمعة البائع والشاري مع الأعضاء الآخرين من خلال تعاملاته معاهم ومدى جديته ومصداقيته بين الناس

البيانات اللي هايطلبوها منك (عن الراسل والمرسل إليه):
الأسم بالكامل
العنوان بالتفصيل
رقم البطاقة (عشان التسليم لا يتم إلا بالبطاقة)
رقم الموبايل (عشان في حالة عدم العثور على العنوان بيتصلوا بيه يوصفلهم الطريق)

طيب اتكلمنا عن كل حاجة ماعدا مواعيد العمل والتسليم
بالنسبة لمواعيد العمل الرسمية للشركة فهي من 9 صباحا لـ 5 عصراً يوميا ماعدا الجمعة
أما بالنسبة لمواعيد توصيل الشحنات فتوصيل الشحنة بيتم في اليوم التالي مباشرة وأيضا إرجاع المبلغ المطلوب بيتم في اليوم الذي يليه (ولا يتم احتساب أيام الاجازة والعطلات الرسمية)

يعني بالبلدي كده لو النهاردة بعتت شحنة مقابل مبلغ لواحد في طنطا
هاسلم الحاجة للمندوب النهاردة
بكرة هايكون المشتري بيستلمها وبيدفع الفلوس
بعد بكرة هاتكون الفلوس عندي

والشركة بتقللك انه حسب ضغط وظروف الشغل انه أحياناً بيكون فيه فترة تأخير أقصاها 24 ساعة
لكن انا اتعاملت معاهم اكتر من 10 مرات وماحصلتش معايا الصراحة ولا مرة

أما عن ارقام تليفونات الشركة فهي كالآتي:

القاهرة:
الفرع الرئيسي
2413033/02
(سبع خطوط)
الزمالك
7356428/02
7374253/02
هليوبوليس
4159340/02
2917291/02

الأسكندرية:
4876706/03
5464379/03

برج العرب:
4592635/03

العاشر من رمضان:
412199/015

دمياط:
2410733/057

المنصورة:
2301404/050

الإسماعيلية:
348746/064

بورسعيد:
347790/066

السويس:
332325/062

طنطا:
3325822/040

بني سويف:
2333960/082

المنيا:
2374907/086
2338833/086

6 اكتوبر:
8332455/02

أسيوط:
349975/088

سوهاج:
313351/093

قنا:
320293/096

الأقصر:
375044/095

أسوان:
318429/097

نجع حمادي:
595814/096

شرم الشيخ:
663075/069

الغردقة:
447622/065

وبالنهاية أتمنى يكون موضوعي مفيد للناس ويارب يعجبكم،
أخوكم/MoDyNeT99

ارجو التثبيت ليستفاد الجميع

الموضوع منقول للفائدة

AMER020 · #2 13-09-2008, 05:36

الكلام ده مبيحصلش

وانا بعت جبت بوردة من مصر حاسبونى عليها 30 جنيه شحن

وشركة معاملتهم مقرفة

والله يوم ما روحت استلم الحاجة اتعركت معاهم لانهم كلهم نايمين على نفسهم

ولا فى اى اهتمام بالعميل

وبعدها بعت شخص اخر يستلمها علشان اللى بعتهالى شركة محترمة

انما هى شركة شحن تعاملها زى القرف

وده من وجهة نظرى

وفى حاجة ان الشركة كانت مفروض توصلى المازر لحد باب البيت والكلام ده محصلش

ameer_s · #3 13-09-2008, 07:00

نصدق مين ؟؟؟؟؟

nagaty_1 · #4 13-09-2008, 16:08

السلام عليكم

أحب اوضح لحضرتك ان الاسعار دى اتغيرت من فتره

و دلوقتى الاسعار الجديده كالتالى

اول كيلو 13.25 جنيه و اى كيلو بعد كدا ب 2 جنيه فقط

و لو هتستلم فلوس هتدفع 13.25 جنيه على الفلوس لأنها بتتحاسب على اساس شحنه راجعه كيلو

و على كل ألف جنيه بيخدو 3 جنيه

....

مثال للتوضيح

لو حضرتك شارى كارت من واحد و الكارت ب 1500 جنيه ووزنه 2 كيلو

فالحسبه هتكون كالتالى

13.25 جنيه اول كيلو + 2 جنيه تانى كيلو +13.25 جنيه مصاريف شحن الفلوس الى راجعه + 3 جنيه أول الف + 3 جنيه تانى ألف

= 34.5 جنيه

و هكذا ....

9800gtx · #5 17-09-2008, 06:25

اقتباس:

المشاركة الأصلية كتبت بواسطة nagaty_1

السلام عليكم

أحب اوضح لحضرتك ان الاسعار دى اتغيرت من فتره

و دلوقتى الاسعار الجديده كالتالى

اول كيلو 13.25 جنيه و اى كيلو بعد كدا ب 2 جنيه فقط

و لو هتستلم فلوس هتدفع 13.25 جنيه على الفلوس لأنها بتتحاسب على اساس شحنه راجعه كيلو

و على كل ألف جنيه بيخدو 3 جنيه

....

مثال للتوضيح

لو حضرتك شارى كارت من واحد و الكارت ب 1500 جنيه ووزنه 2 كيلو

فالحسبه هتكون كالتالى

13.25 جنيه اول كيلو + 2 جنيه تانى كيلو +13.25 جنيه مصاريف شحن الفلوس الى راجعه + 3 جنيه أول الف + 3 جنيه تانى ألف

= 34.5 جنيه

و هكذا ....

لو الكلام ده مظبوط يبقى 100 100

لأنى لما اشتريت رامات (كيت 2 جيجا فى علبة صغيرة جدا) أخدوا منى 35 جنيه .....أى والله 35 جنيه

بس هما للأمانة بيوصلولى الحاجة لغاية البيت

yasserxpnew · #6 17-09-2008, 11:30

نقدر نقول انهم بينقلوا حاجات الكومبيوتر فى حدود 30 جنيه معادا الكيس والشاشه لانهم الاثقل وزنا
انا ارى اهميتهاها فى الحاجات الغاليه الغير متوافره مثلا فى الاسكندريه
يعنى حاجه مثلا ب1500 جنيه مثلا تستحق انى اصرف عليها 50 جنيه شحن
لكن انا مثلا على المنتدى ببيع برده ولا رامات ب150 جنيه
لما ادفع 30 شحن يبقى خراب بيوت طبعا
وشكرا ... وارجو تقبل وجهة نظرى

The King2 · #7 17-09-2008, 17:55

خدمه جميله ... أشكرك على الموضوع مودى
ولكن هل للشركه تعامل مع شركات الكمبيوتر ==> يعنى لو إحتجت قطعه معينه أطلبها .

kazablnka · #8 05-10-2008, 05:41

بس لما تحب تبعت حاجه لازم تروح انت لشركه الشحن مش هما اللى يجولك علشان الميزان وغيره صح؟
انا اتعامل مع ميدل ايست من فتره شركه كويسه بس مجربتش فى الاوزان الكبيره
انا ارسل سى ديهات يعنى وزن السى دى مثلا بيعمل 12 جنيه تقريبا للقاهره