سؤال لأهل الخبرة في مجال الشبكات

السلام عليكم ورحمه الله وبركاته.

بدايه انا متخرج من كليه شرعية أزهرية ملهاش أي علاقه بمجال الـ IT لكني درست المجال دا كـ كورسات في كلية هندسة جامعة المنصورة وسنترات تانية ومعايا شهادات موثقه من الكلية والجامعة باللي درستة والكوسات دي MCSA - MCSE - MCITP ودرست CCNA بس مش متذكر منها حاجة يعني فبصفه عامة انا درست مجال الشبكات. الكورسات دي درستها في أوقات مختلفه ابتدت من 2010.في البدايه كنت متحمس جداً للموضوع وبذاكر على أساس هشتغل لما اخلص زي ما فهموني في الكلية واللي اتضحلي في الاخر انه سنتر متعاقد مع الكلية المهم اني بعد ما خلصت الدراسه واتخصصت في مجال الشبكات مشتغلتش ولا عرفت الاقي شغل ازاي.أخدت كورس MCITP في السنتر لأنهم قالوا اوائل الدارسين في الكورس الماضي ليهم كورس كامل مجاني فبعد مرور حوالي سنه تقريباً من دراستي لكورس MCSE روحت اخدت كورس MCITP.وبردوا مشتغلتش وقولت اكمل واخلص الكلية واخلص الجيش واتفرغ تماماً.
انا حالياً خلصت جيش والمشكلة عندي أني مش عارف أبدأ ازاي ومنين ولا عارف حتى ألاقي شغل ولا أدور فين حتى كتدريب مش عارف.والمشكلة الأكبر ان اللي درسته دا بنسبة كبيرة تايهه فيه اينعم لو ذاكرت هلم كل اللي نسيته بس هلاقي في تحديثات حصلت انا مش هكون مُلم بيها ولا عارف احصل عليها منين، بقنع نفسي انه مذاكرش أي حاجة غير لما أشتغل عشان مضيعش وقت في الفاضي وافضل اذاكر وارجع لنفس النقطة اللي انا عندها حالياً.
انا شغال كويس في الصيانة سواء سوفت او هارد وكنت بساعد واحد صاحبي كان عنده محل صيانه كمبيوتر لكني لما جيت ادور اشتغل Help desk معرفتش الاقي ولا عرفت اكتب ايه في الـ cv.
سألت حد شغال في مجال الشبكات ووريته الشهادات اللي معايا ونصحني أشتغل Help desk Or technical support.
المشكلة انا حتى لو هشتغل Help desk فانا معرفش أروح فين ولا أعمل ايه + بناءاً على الكلام اللي كتبته دا مفروض أكتب في الـ CV بتاعي ايه لو هشتغل Help desk ؟
انا أسف على الاطالة والله.
في المرفقات صور الشهادات اللي حصلت عليها.
شكراً جزيلاً.