تاج الطفوله

[CR@N$H]

في الحقيقة موضوع أكثر من رائع
اصابني بحالة من الضحك الهستيري
بانتظار المزيد من المشاركات الرائعة

[الأميرة]

في الحقيقة موضوع أكثر من رائع
اصابني بحالة من الضحك الهستيري
بانتظار المزيد من المشاركات الرائعة

أيوة وانا كمان والله ضحكت بشكل

انا أضفت اسم حضرتك كمان

يعني التاج عندك

ياريت نشوف ذكريات حضرتك في الطفوله

[NASA Science]

أنا على فكرة شغال فيها , بس بعمل أكتر من حاجة فى البيت
ممكن كرانش يبدأ ومن ثم أنا بعده

[Black-Edition]

موضوع جميل جداااااا واستمتعت جدا بالقراءة

بس انا ملاحظ ان الجميع كبير فى السن ( عواجيز ) :D

اصل انا 18 سنة ... شباب بقى :p

[NASA Science]

بداية لما كنت طفل صغير حوالى 8 سنوات , كنت أمور جدا جدا الكل كان بيحب ياخدنى معاه وخاصة الشباب , علشان طبعا أبقى الطعم للبنات , لدرجة إنى السيد الحاجة أمى ((الله يسامحها بقى)) كانت بتلبسنى فساتين البنات ,(( وأنا صغير يا جماعة , ماشى))

كان طبعى هادى جدا محبوب بين كُل من يعاشرنى, لدرجة إنى مرتبط بأصدقائى الى الأن من أيام 4 ابتدائى , ياااه أيام ,
حياتى كُلها كانت لعب فى لعب
نو مذاكرة , نو تعليم , وأحيانا نو مدرسة
بلعب فى المدرسة , بعد مخرج من المدرسة كورة طبعا او بالياردو , فى الشارع بلى و بلايستيشن تكن وكراش

الى أن وصلت مرحلة الأعدادية والحمد لله سقطت فى مرحلة الأعدادية وقعت فى مادة فأختى الكبيرة قالتلى عيد السنة وفعلا عيدها
وسبحان الله حياتى كُلها أتغيرت رأسا على عقب , جبت مجموع عالى
بدات مرحلة الثانوية ودائما كنت من الأوائل
اولى ثانوى = الأول على المدرسة
ثانية ثانوية =الثانى على المدرسة
تالتة ثانوى=الأول على الفصل على المدرسة على الإدارة واتكرمت وغيره
وكنت بلعب كاراتيه والمدرب رشحنى لبطولة الجمهورية ولكن للأسف لم أدخل ولم أستمر فى اللعبة , لظروف ما

أما بالنسبة للكارتون المفضل لدى : كان عالم الفواكه (شوكى وموزى) , ماوكلى , الدولفين , سلاحف النينجا , مازنجر , جرانديزر , توم وجيرى , سينما الأطفال , وفى تانى بس مش فاكر أسماهم
و على فكرة أنا ممكن اتفرج على مسلسل كارتون ولا إنى أروح السينما دلوقتى

أفضل أيام , أيام الطفولة والصبى
لا هم ولا حزن ولا حتى خوف من سرقة الوقت

على فكرة يا جماعة أنا إتكلم دون خجل او كسوف من شئ واتكلمت بصراحة , لانها تعتبر نزهه جميله

أمرر التاج الى CR@N$H

[MF88]

^^^ إنت جى تذلنا ؟ :D

لما قررت احط صوباعي مكان الفيشه :D
وكنت سبب رئيسى في تغير كل أماكن الكهربا في البيت

طريقه كتابه الجمله تدل على إنك شقيه لأبعد الحدود :D

كنت بحب البحر جدا ولازلت مكنتش بخاف منه زي الاطفال ..
والنتيجه أكتر من مرة كنت هغرق :ah7:

بالزبط مثل أختى - انا كنت بخاف منه جدا و انا صغير و لما أختى تجرجرنى عشان انزل أمسك الرمل و أعمله كور و أضرب البحر بيه

:D لحد ما فمره قولت هو انا هخاف لحد إمتى بقى انا قفايا ولّع من الشمس والله لا نازل و اللى يحصل يحصل . وهوب روحت ناطط

و مغرقتش الحمد لله




بس غرقت لما نزلت حمام السباحه تانى يوم على طول :D

[MF88]

نو مذاكرة , نو تعليم , وأحيانا نو مدرسة
Love Science

:confused:

هنكدب من أولها :D

[NASA Science]

كمل القراءة للأخر وأنا هفسر كل حاجة عايزها

على فكرة أنا بموت من الضحك من تعليقاتك

[CR@N$H]

سأبدأ
منذ الطفولة و حياتي تتمحور حول الحاسب فأنا تعرفت على الحاسب اول مرة عندما كان عمري 4 سنوات "عام 1994"
وفي عمر الخامسة شاهدت أول مبارة في المصارعة الحرة وفي تلك اللحظة بدأت أميل إلى العنف "وخصوصا اني كنت قد دخلت إلى المدرسة"
طبعا قبل هذه المرحلة كنت طفل في قمة الهدوء فحسب ما يقول لي الأهل انهم بحثوا عني في الشوارع مرتين وانا في عمر الثلاث سنوات "هناك سبب من هروبي من المنزل في هذا العمر :D "
في الابتدائية كنت "ملاك" و اصدقائي الأربعين حرامي فكنت دائما أزور مديرة المدرسة بسبب المشاكل "الحمد لله ان امي كانت مدرسة في نفس المدرسة التي كنت فيها والا كان يجب ان يخصصوا غرفة للأهل داخل المدرسة" ولكن الحمد لله لم اصب احد بضرر بالغ بعض النزيف هنا و هناك و الجروح وقليل من الكسور وعندما أكون في حالة سلم فكرة القدم هي السبيل
كنت العب كمدافع و من اهم شروط المدافع هو إعاقة الخصم لذلك في احد الاسابيع قمت بتمزيق 4 بناطيل
طبعا يمكنكم ان تجمحوا بمخيلتكم بقدر ما تشاؤون بما حدث لي عندما عدت إلى المنزل وتم الانتهاء من البنطال الرابع :cool:
في المنزل كنت هادئ جدا لاني غالبا كنت على الحاسب وعندما لا اكون على الحاسب فانا على التلفاز
أما الكرتون فانا استطيع أن أقول "I've seen them all" بس مش All أوي يعني
من منكم يذكر سميد و عبقور و سنان و طمطوم و رغيف الخبز و صراع الجبابرة "سأقتلك يا لوبو" و و و و و وإلى الأن انا اتابع و اشاهد هذه المسلسلات في حال تعثرت بها على التلفاز بالإضافة إلى برنامج الحصن "الاسطورة"
وحاليا اشاهد الأنمي الياباني

أي سؤال و استفسار عن هذه الطفولة البريئة
حتاخذ تقييم سلبي :D

[الأميرة]

أفضل أيام , أيام الطفولة والصبى
لا هم ولا حزن ولا حتى خوف من سرقة الوقت

عندك حق

على فكرة أنا بموت من الضحك من تعليقاتك

آه والله كل التعليقات والمواضيع تحفه )

[الأميرة]

"
في الابتدائية كنت "ملاك" و اصدقائي الأربعين حرامي فكنت دائما أزور مديرة المدرسة بسبب المشاكل "ا

ما شاء الله ما شاء الله ..لحد الوقت وطبقا لهذا الموضوع فالساده اعضاء المنتدى لهم تاريخ حافل )

ممكن نسمى المنتدى بعد كده عصابه عرب هاردوير )

أي سؤال و استفسار عن هذه الطفولة البريئة
حتاخذ تقييم سلبي :D

مين هيستفسر ؟ مين هيلعب في عداد عمره ؟؟
الكل الحمد لله كان طفوله بريئه

[akis]

نعمة الطفولة لا يشعر بها إلا من حرم منها

[EL-MARIACHY]

يا كلكم عايزينى ألبس التاج !! هتندموا !!

نبدأ بسم الله الرحمن الرحيم :


فاكر الكارتون المفضل ؟

لا اتذكر بالظبط الكارتون المفضل حيث أنه لم يكن لدى وقت للفرجه على الكارتون لان منذ بدأت أن أستوعب كان عندى حوالى 5 سنوات

و من سن 5 الى سن 10 أو 11 كده لم اكن فى المنزل كثيراً حيث انى كنت دائماً فى المستشفى و العمليات و لكن معظم الوقت كان عمليات لإختى ، إنما أنا كانوا 4 او5 لا أتذكر بالظبط

لهذا كل من يقابلنى و يجدنى أفعل أفعال لا تليق بسنى :D يقول لى " إنت مكنتش طفل قبل كده ؟؟"

ممكن نقول توم&جيرى كارتونى المفضل


ذكريات اول مراحل التعليم ؟


فى مرحله الإبتدائيه كنت فى مدرسه إسمها "Manar house" و كانت مدرسه رفعيه المستوى لدرجه عاليه ، حيث كان المدرسه بتاعت الإنجليش من بريطانيا و كانت لا تعرف كلمه واحده عربى

و مدرسه الفرنش "French" كانت مصريه على ما أعتقد و لكنها كانت خرافه فى الFrench و يمكن هذا ما جعلنى موهوب فى الفرنش فى مراحل الدراسه

مديره المدرسه كانت ايضاً من إنجلترا و كانت إسمها Linda و كانت متوقعه منى إنجازات كبيره لما اتخرج حيث انى والدى لما قعد معاها ووجدت أنه عبقرى فظنت أنى كذلك – الحمد لله إنى لم أكن كما توقعِت :D –

و كنت فى هذه المدرسه كما تقولون كده البلطجى فى المدرسه ، مره عضيت واحد و كثيراً ما كنت أفتعل المشاكل و لكنى لا أتذكر أياً منها حالياً و لكن ما اتذكره ان كميه ورق الإستدعاء عندنا فى البيت كان والدى بيدبسه مع نتيجه كل سنه :D

و بعدين حصل اكبر تحول فى حياتى و هى إنتقال المدرسه الى التجمع الخامس بعد ما كانت تحت بيتى مباشراً

فطبعاً أهلى خافوا عليا :rolleyes: و بدأ رحله البحث عن مدرسه اخرى ، و إتضحت الحقيقه الأليمه ان كل المدارس المحترمه و التى تليق بنفس المستوى السابق كانت كلها على طريق السفر و لهذا بدأ أهلى يفكر فى مدرسه مستواها أقل من المدرسه اللى فاتت فى المنطقه المحيطه

هنا حدث اكبر تطور فى حياتى ، حيث كنت فى هذه الفتره العب 3 ألعاب رياضه :

1- تايكوندو
2- سباحه
3- Basketball

لا تسألونى كيف كنت ألعبهم و لكن كنت بالعبهم جميعاً .

نرجع للمدرسه الجديده ، المدرسه إسمها " كليوباتراً " و طبعاً سمعت تريقات عليها للصبح

المدرسه دخلت قضيت بها من الإعداديه حتى أنهيت الثانويه

كما تتذكرون قلت لكم من قبل أنى كنت بلطجى فى المدرسه القديمه ، صح ؟

طبعاً دخلت المدرسه الجديد كبلطجى قديم يعنى :cool:، فى أول يوم إترنيت علقه محترمه ، قلت ماشى يمكن الواد ده جامده

ثانى يوم علقه محترمه ، ثالث يوم و هكذا لمده إسبوع :D

و البلطجه بتاعتى كانت إنى كنت أغلس على الناس أو بمعنى أصح كنت بأستفزهم

لم اضرب أحد قط و لم افترى على احد ، كل اللى كنت باعمله كان كلام و أفعال إستفزازيه

و طبعاً أول ما العيال فى المدرسه الجديده عرفوا انى بالعب تايكوندوا بدأو يضربونى كلهم ، كبيرهم و صغيرهم و حتى البنات

كل ده علشان عايزين يعرفوا رد فعلى

و للأسف عملت غلطه ، كان مره كذا واحد عمال يضرب فيا و يغلسوا عليها و يأخذوا أشيائى و يبصقوا عليا و كل الأفعال الإستفزازيه اللى ممكن تتعمل

لغايه فى مره رحت ضارب واحد منهم و طيرت الثانى و من ساعتها بدأت أيامى السوداء

حيث كانت كل الفصول تأتى لتضربنى حتى يشوفوا رد فعلى و من ساعتها اصبحت أتلقى الضربات و الإهانات و لا أرد



بالنسبه للرياضه عامتاً فانا كنت باحبها و لكن الفكره ان والدى عارف انى مُسالم ولا أقدر على اذيه احد فلهذا السبب أراد أن " يقوى عظمى " كما يقولون

و طبعاً كنت إنطوائى بشكل كبير جداً و قل بنسبه الأن و لكنى مازلت إنطوائى

فعلشان كده الحقنى بفريق السله علشان اندمج مع الفريق و الكلام الفاضى ده و طبعاً لم افلح

الرياضه التى فلحت فيها هى السباحه و لكن للأسف كنت أمارسها مع التايكوندو و طبعاً إرتقيت فى مستوى السباحه و إلتحقت بما يسمونه " الفريق الخماسى"

فجاء يوم وجد أبى ان ضربات قلبى ليس على ما يرام – هو جراح قلب على فكره – فذهب بى لأصدقائه الدكاتره فقالوا له ان عضله قلبى أصبحت ضعيفه من كثره الرياضه و يجب أن العب رياضه واحده فقط

فطبعاً الرياضه التى كان مفروض ألعبها هى .........................................












برافو >>> كانت التايكوندو :D طبعاً لا تسالوا كيف و لكن هذا ما حدث

طبعاً كما تعلمون انا أكره جداً أن ألحق الأذى بأى شخص و بالتالى كنت فاشل فى التايكوندو جداً ، لأنها رياضه دفاع عن النفس و الكلام ده فمن ضمن التمارين انى بنزل فى مباريات امام خصم و لازم اضربه و هو يضربنى

الطريف فى الموضوع إنى إستمريت فى إقناع نفسى قبل أى مباره سواء كانت محليه أو على مستوى الجمهوريه بالأتى : " لو أنا ماضربتوش فهو أكيد مش هيضربنى :D "

و طبعاً كلكم عارفين النتيجه

لم يكن لدى شيئ إسمه وقت فراغ على الإطلاق حتى دخولى الجامعه و ساعتها إتعرفت على وقت الفراغ

هتقولوا والأجازه الصيفيه ، فهقول لكم إنى كنت بأذهب الى المعسكرات حتى نتلقى التدريبات الكافيه حتى نتأهل للبطوله

و على فكره أنا كنت محترف جداً فى التايكوندو و لكنى لا أستخدمها الا عندما أحتاج إليها و لهذا السبب كنت دائماً أخسر فى المباريات > لأننى ببساطه لا اريد أن أضرب شخص غريب لم يمسسنى بسوء !!

بالنسبه للى بيفرحنى :

عندما كنت أنزل المباره و عارف طبعاً أنى هتضرب و كنت بأظل المباره كلها أدافع و أجد اكثر من 300 واحد من فريقى و أهليهم اصدقائهم بيقولى إضرب و أنا مش بضرب :o

فاكثر شيئ كان بيفرحنى هو إنى لما كنت بانزل المباره و الخصم بتاعى يشوفنى قبل بدء المباره فكان ينسحب و يخاف منى قبل أصلا بدء المباره ( لأنى كنت طويل جداً بالنسبه للوزن الذى ألعب فيه - كنت طويل و رفيع- ) و كنت دائماً أتأهل من المبارايات اللى على مستوى الأنديه الى المباريات اللى على مستوى المنتخب اللى فيها المحترفين بتوع الدوله كلها علشان يتأهلوا الى المباريات الدوليه

فطبعاً أكثر حاجه كانت بتفرحنى إنى كسبت بدون ما ألعب و طبعأً باعمل اى حاجه علشان أخسر المباره بتاعت المنتخب علشان أروح بيتى سالماً.



اكثر شيئ كان يبكينى فى أيام المدرسه هو عندما كان العيال بيضربونى و يسبونى و يهيننونى و كنت لا أريد ان أرد عليهم لأنى كنت أقوى منهم ولو رديت عليهم كنت هألحق بهم الأذى الشديد .



و طبعأً بابكى من أى فيلم على نفس النهج بتاع فيلم A.I.



معلش طولت عليكم

و الحمد لله مافيش أسئله هنا لأننا ليس على كرسى الإعتراف و الحمد لله إنه إتقفل برضه :D




أحب أمرر التاج للمشرف القدير Eng.Taher

[MF88]

سأبدأ
منذ الطفولة و حياتي تتمحور حول الحاسب فأنا تعرفت على الحاسب اول مرة عندما كان عمري 4 سنوات "عام 1994"
وفي عمر الخامسة شاهدت أول مبارة في المصارعة الحرة وفي تلك اللحظة بدأت أميل إلى العنف "وخصوصا اني كنت قد دخلت إلى المدرسة"
طبعا قبل هذه المرحلة كنت طفل في قمة الهدوء فحسب ما يقول لي الأهل انهم بحثوا عني في الشوارع مرتين وانا في عمر الثلاث سنوات "هناك سبب من هروبي من المنزل في هذا العمر :D "
في الابتدائية كنت "ملاك" و اصدقائي الأربعين حرامي فكنت دائما أزور مديرة المدرسة بسبب المشاكل "الحمد لله ان امي كانت مدرسة في نفس المدرسة التي كنت فيها والا كان يجب ان يخصصوا غرفة للأهل داخل المدرسة" ولكن الحمد لله لم اصب احد بضرر بالغ بعض النزيف هنا و هناك و الجروح وقليل من الكسور وعندما أكون في حالة سلم فكرة القدم هي السبيل
كنت العب كمدافع و من اهم شروط المدافع هو إعاقة الخصم لذلك في احد الاسابيع قمت بتمزيق 4 بناطيل
طبعا يمكنكم ان تجمحوا بمخيلتكم بقدر ما تشاؤون بما حدث لي عندما عدت إلى المنزل وتم الانتهاء من البنطال الرابع :cool:
في المنزل كنت هادئ جدا لاني غالبا كنت على الحاسب وعندما لا اكون على الحاسب فانا على التلفاز
أما الكرتون فانا استطيع أن أقول "I've seen them all" بس مش All أوي يعني
من منكم يذكر سميد و عبقور و سنان و طمطوم و رغيف الخبز و صراع الجبابرة "سأقتلك يا لوبو" و و و و و وإلى الأن انا اتابع و اشاهد هذه المسلسلات في حال تعثرت بها على التلفاز بالإضافة إلى برنامج الحصن "الاسطورة"
وحاليا اشاهد الأنمي الياباني

أي سؤال و استفسار عن هذه الطفولة البريئة
حتاخذ تقييم سلبي :D

انت اسم عضويتك كرانش عشان بتقرمش ؟ قرمشت 4 بناطيل و خلصت على أبناء مدرستك :D و فيه حد يهرب وهو عنده 3 سنين ؟
كنت هتهرب مع حبيبتك وللا إيه ؟؟ ياريت نعرف السبب :D:D:D:D:D

إبقى إدينى تقييم سلبى و شوف هعمل إيه ( هطلع عليك طفولتك بحالها :D:D:D:D:D:D ههههههه بهزر طبعا )

ممكن نسمى المنتدى بعد كده عصابه عرب هاردوير

:ah40:

نعمة الطفولة لا يشعر بها إلا من حرم منها

هو انت تعرف حد أتولد و لم يمر على مرحله الطفوله ؟؟؟ :eek::D


المارياتشى : ذكرياتك كتير :D هشوفها بكره على رواقه

[MF88]

و الحمد لله مافيش أسئله هنا لأننا ليس على كرسى الإعتراف و الحمد لله إنه إتقفل برضه :D

ده مين اللى فهمك كده ؟

طب وحياتك لتكون الضيف الجى :D