بسم الله الرحمن الرحيم
بعد تفكير طويل في شراء كيسة احترافية من عدمه , استقريت على الـ Scout
أول و أهم السبب هو الشكل لأن كان يهمني شكل الجهاز عموماً خصوصاً مع الكيسة الجامبو المكسورة اللي كانت عندي و الموجودة حالياً تحت السرير بتغنّي ظلموه .
و كان تاني سبب المخارج الأمامية الموجوده في الكيسة , لأن كان عندي صعوبة في تركيب أي فلاشة او أي حاجة في ضهر الجهاز
و كان السبب التالت بالنسبة لاستخداماتي هو التهوية , و خفض صوت الجهاز عموماً خصوصاً في الصيف , و لو أني متوقّعتش الكتير بدون مشتت احترافي للبروسيسور رغم أنه حرارته منخفضة بطبعه , و لكني تفاجأت بالتغير في درجة الحرارة!
نبدأ بالصور:-
دي صورة للكيسة من على النت
دي صورة للكرتونة اللي عاجباني جداً (يمكن بدافع التخصص)
و دي صورة للكيسة على الطبيعة
صورة لمداخل الكيسة , أربع مداخل USB و مدخل eSATA و مداخل الهيدفون و المايك
بالاضافة لزر اضاءة و اطفاء اضاءة المراوح (خاصية جميلة لو متحبش مهرجانات الألوان)
و دي صورة للكيسة من الأعلى , و بيظهر فيها فتحة مروحة 14 سم , و يعيبها عدم وجود فلتر للتراب , بس ممكن السبب أنها مروحة لاخراج الهواء (بس برده مش سبب كافي , لأن التراب هيدخل و الجهاز مقفول)
و دي صورة لجانب الكيس الأيمن (لو وشها في وشك)
و دي المتعلقات اللي جت مع الكيسة , و هي أكتر من اللازم بكتير , بصراحة كولر ماستر كفّت و أوفت في النقطة دي , و بيظهر فيها دراعات تركيب الهاردات بدون مسامير , و وش اضافي في حالة تركيب 3.5" Drive , بالاضافة لمسامير من كل الأنواع بعدد كافي و زيادة
نيجي للكيسة من الداخل
و دي أماكن الـ HDD Cage
و دي المروحة الخلفية الملوّنة باللون الأحمر كشقيقتها الأمامية , و هي بمقاس 12 سم , و يظهر في الصورة نظام تركيب الكروت بدون مسامير , فقط كليبس يمسك الكارت و خلاص
و دي صور لامكانية تنظيم الكابلات , و هي ممتازة في الكيسة دي بصراحة (للأسف نسيت أخد صورة من الخلفية و الكيس مفتوحة كانت هتوضح أكتر)
و دي صورة للوش الأمامي بعد فكّه من الكيسة (عشان يسمح بتركيب الDVD-ROM و خلافه) , و يظهر امكانية تركيب مراوح فيه تحت الوش الأمامي
و ده الوش الأمامي نفسه , و على فكرة فكّه سهل جداً , بتشدّه من مكانه فقط
و صورة للباب الجانبي الشفاف من الداخل , و على فكرة هو مش أبيض شفاف زي ما كنت فاكر , هو لونه غامق شوية , و بصراحة أشيك
و صورة مقربة للباب بتوضّح أماكن تركيب لتركيب مراوح اضافية بحجم 12 سم
و دلوقتي مع الصور الأهم , و هي التغير في درجات الحرارة مع الكيسة القديمة (الجامبو) و الكيسة الجديدة , طبعاً الاتنين بدون كسر سرعة البروسيسور , و في نفس اليوم و التوقيت و نفس درجة حرارة الغرفة , مع ضغط ببرنامج Prime 95 لمدة 30 دقيقة
أولاً الجامبو
بعد كده الـ Storm Scout
و واضح من الصور انخفاض في درجات الحرارة كالتالي
المعالج 7 درجات لسطع المعالج و الأنوية
الجسر الشمالي 6 درجات
الهارد 14 درجة , و ده يرجع لأنه خلف المروحة الأمامية مباشرة
و الدرجات دي مع عدم تشغيل المروحة الخلفية , يعني الأمامية و العلوية فقط
نهاية الكيسة ممتازة مقابل تمنها , و أعطيها 9/10 مقابل الشكل , و 8/10 مقابل التبريد
يعيبها فقط أنها متاخدش كارت زي 5870 و طبعاً ال5970 , آخرها بس 5850HD و كل كروت Nvidia بما فيها الفيرمي
و تم شراءها من شركة ماكسيمم هاردوير يوم نزولها السوق المصري , و كان سعرها 520 جنيه
المفضلات