و الله يا مينا الجهاز بقاله 10 أيام معايا و هو بفضل الله شغال معايا كويس جداً ، و هو جهاز جميل جداً الصراحة و لكن لى ملاحظتين :
أولاً : الجهاز راماته 4 جيجا فقط و مش هى دى المشكلة لأنها مناسبة لاستخداماتى للجهاز بشكل كبير ( تصفح – قراءة – مشاهدة فيديوهات فقط )
المشكلة فى إن كارت الشاشة المدمج من انتل بيسحب مساحة كبييرة من الرامات فى الوضع العادى حوالى 1.1 جيجا ( 1100 ميجا بايت ) و مع الشغل و فتح المتصفح و العديد من الصفحات و مشاهدة الفيديوهات عاليوتيوب بيسحب مساحة أكبر بتصل لـ 1.5 جيجا ( 1500 ميجا ) .
و بالتالى أنا مش مستمتع غير بـ 2.5 جيجا رامات فقط ، و أنا كنت عارف كده قبل شراؤه و لكن مكنتش متخيل إن كارت الشاشة بيسحب المساحة دى كلها ، كنت فاكر إنه بيسحب 1 جيجا كحد أقصى ( 25 % من الرامات ) .
و دى تتحل بإذن الله بشراء رامة أخرى 4 جيجا قدام شوية .
ثانياً : الجهاز طول ما هو متوصل بالكهرباء درجة حرارته طبيعية جداً و لكن مع الاعتماد على البطارية بيسخن شويتين ( البطارية عند استخدامها بتسخن و بتسخن البوردة و الهارد و اللاب معاها ككل ) .
و لازم يكون فيه تهوية و تبريد جيد عند استخدام البطارية ( خصوصاً إننا فى الصيف و أنا مش عندى فى البيت مكيف و بستخدم مروحة عادية ) .
الحل عند استخدام الجهاز بالبطارية هو وجود تبريد و تهوية مناسبة لأن الجهاز بيتأثر بدرجة حرارة الغرفة و المكان الموجود به ، و شراء قاعدة تبريد جيدة و مناسبة لللاب .
غير كده اللاب حلو و جميل جداً و هادئ ( صوته مش عالى حتى مع ارتفاع حرارته ) .
و متسألنيش عن الألعاب لأنى مليش فيها خالص ، و كارت الشاشة أصلاً مش مخصص للألعاب القوية ، و لكن أعتقد أنه يشغل عدد كبير من الألعاب العادية برضه و ممكن المتوسطة كمان .
و لكن بيشغل أفلام HD و أفلام بجودة عالية عاليوتيوب بشكل طبيعى و عادى .
الجهاز صوته مش عالى أوى ( عند استخدام السماعات الخارجية بتاعته ) مع إنى نزلت أحدث تعريف لكارت الصوت .
التاتش باد بتاعته جميلة جداً و لكن مع ضبط الاعدادات بتاعتها بشكل دقيق .
البطارية بتقعد حوالى 3 ساعات تقريباً أو 3 ساعات و ربع ، مع استخدام خاصية توفير الطاقة و التصفح العادى .
ده كل اللى أقدر أفيدك بيه ، و لو عندك سؤال معين اسأل و أنا أجيبك .
المفضلات