* الرجاء قراءة جميع مشاركات الموضوع ما أمكن نظرا لوجود عدد من الردود والتوضيحات وإختلاف الآراء
السلام عليكم
تحياتى لأعضاء المنتدى الكرام . طبعا مساحات الهاردات كل يوم فى ازدياد وبقت الهاردات التيرابايت منتشرة. والواحد بيشترى الهارد بالمساحات الضخمة دى ويقعد يجمع عليه داتا بأنواعها من خلال وقت ومجهود و تحميلات طويلة على مدار شهور ويمكن سنوات . بس المشكلة الكبيرة جدا هل تعرف ان الداتا دى ممكن تطير كلها فى لحظات ؟ لأن الهاردات للأسف هى مكونات لا يمكن الإعتماد عليها على الإطلاق ومشاكلها كتير جدا جدا .
يا ريت تقروا الموضوع ده :-
https://www.arabhardware.net/forum/s...23#post1044723
خلاصة تجربتى مع الهاردات (لأن كان فيه عندى هاردات تانية حصل فيها مشاكل أخرى قبل كده):-
1- عدم شراء أى هارد بمساحة تزيد عن 500 جيجا (لا تضع البيض كله فى سلة واحدة ) ، ولكن شراء اكثر من هارد بمساحات متوسطة
2- وضع جزء فى ميزانية الجهاز لهارد خارجى (هارد USB 2.0) يخصص لعمل نسخة احتياطية Backup بشكل دورى مستمر لمحتويات الهاردات الداخلية للجهاز ، وذلك يدويا او بمساعدة البرامج المتخصصة فى ال Backup
3- وضع جزء فى ميزانية الجهاز لمثبت تيار Stabilizer (ويسمى كذلك Surge Protector) وذلك لحماية جميع مكونات الجهاز وليس الهارد فقط من تقلبات التيار الكهربى (وما أدراك ما تقلبات التيار الكهربى فى مصر) ، وان امكن شراء UPS
(Uninterrupted Power Supply يكون أفضل طبعا .
4 - الهاردات عمرها الأفتراضى (وكذلك الفعلى بالتجربة العملية) لايزيد عن ثلاث سنوات فى حالة الإستخدام المكثف ، وممكن تمتد لخمس سنوات فى حالة الأستخدام العادى أو أقل . وبحثت فى الحكاية دى فى منتديات أجنبية لقيت فعلا ان رقم 3 سنوات ده متكرر مع ناس كتير ، ومش من قبيل المصادفة أبدا ان مصنعى الهاردات زى ويسترن ديجيتال بتضع ضمانة 3 سنوات على الهاردات ، فيعنى اذا كنت بتستخدم الجهاز بشكل مكثف (مفتوح فترات طويلة لعمل تحميلات كبيرة مثلا من الانترنت) وعدى على الهارد سنتين معاك يبقى توقع بداية ظهور باد سكتورز عليه قريبا
- الهارد على فكرة مجرد انه متوصل بالجهاز وواخد كهربا منه (حتى لو مفيش أى كتابة أو قراية منه) بيبقى فيه استهلاك فيه برضه والفترة دى محسوبة من حسابات عمره الإفتراضى ، ولذلك الهاردات الخارجية يتوقع لها إن عمرها يكون أطول من الهاردات الداخلية لأنك بعد ما بتعمل ال Backup عليها بتفصلها من الجهاز .
- لا تعتمد على تقنية SMART بشكل كامل (هى تقنية موجودة فى معظم الهاردات والهدف منها التنبؤ بقرب انتهاء العمر الإفتراضى للهارد ، عشان المستخدم يلحق ينسخ الداتا على هارد جديد ، وبيتم تفعيلها من خلال ال BIOS ) فهذه التقنية تستخدم للإثبات فقط وليس للنفى . بمعنى ان لو ال SMART Status بتقول ان الهارد فيه مشاكل يبقى أكيد الهارد فيه مشاكل وعمره الإفتراضى قرب . لكن لو ال SMART Status بتدى 100% OK فممكن برضه الهارد يكون فيه مشاكل وعمره الأفتراضى قرب (حصلت معايا شخصيا ان هارد ابتدى يعمل باد سكتوزر بشدة و فيه كل مظاهر انتهاء عمره الأفتراضى ومع ذلك كانت ال SMART Status بتدى 100% OK )
- الباد سكتورز لها أسباب كثيرة ، لكن ما اتحدث عنه هنا هو انك بتبقى محافظ على هاردك وجهازك تمام ، وفجأة تلاقى مشاكل فى الهارد ، ولما تعمل سكان تلاقى باد سكتورز . فنظام التشغيل فى الحالة دى بيعلم على الباد سكتورز دى عشان يتجنبها فى القراية والكتابة والمفروض بعد كده الهارد بيكمل شغل عادى ، لكن تفاجئ بعد يومين بظهور بادات جديدة .ففى هذه الحالة يبقى تأكد ان الهارد ده عمره الإفتراضى انتهى وإلحق فورا إنقل الداتا على هارد جديد (أو اذا كنت عامل Backup دورى بالفعل للداتا اللى عليه يبقى انت كده ماشى صح).
المفضلات