جمهورية الكنيف المعتبرة

[crypt76]

صباح الخير (حسب التوقيت المحلى لتومبوكتو)

كان في زمان بلد جميلة اسمها جمهورية الكنيف المعتبرة، يحدها من الشمال البحر الأخضر المتبسط ومن الغرب دولة لوبيا المظفرة الطاهرة القادرة الماهرة العظمى، ومن الجنوب... أهل الجنوب، حبايب فصلهم الفاتح الناضج كمال عبد القادر، زعيم الفورة وقائد "قواد" الوحدة الشنبية... المهم

في داخل الكنيف عاش الشعب البسيط راضي وقانع، يمكن يكون مش مبسوط بس برضه مش محزوق، وكان كافي خيره شره وبيقول "أهه عيشة والسلام"، راضين باللي ربنا قسمه وموافقين على أي "حكيمة" يعينها رئيس الرؤساء وعظيم العظماء... المهم


فجأة جت على الكنيف "حكيمة" عملت الى عمر ما حكيمة قبلها عملته، قفلت على شعب الكنيف وزنقت، لحد ما كله اتحصر واحزق، والناس يا عيني برضه غلبانين وبيقولوا "لا لا، ده الحكيمة حكيمة وأكيد ليها وجهة نظر، مش ممكن تعمل فينا حاجة وحشة"، بس الي هما مكانوش عارفينه هو إن الحكيمة مكانش يهمها شعب الكنيف في حاجة وكانت واخده أوامر من الطراد الأكبر بشد السيفون عليه علشان الكنيف ينضف، وكل شوية الحكيمة تحب تسكت شعب الكنيف بحاجة، فمثلا في مرة الشعب قال لا، احنا هنعمل وقفة ونزعل شوية ونعيط، قامت الحكيمة صرفتلهم علاوة فرحوا بيها واشتروا بقلاوة ونسيوا الوقفة واتلهوا، بس الحكيمة حكيمة ومستنتش كتير وراحت مغلية سعر البقلاوة أكتر من العلاوة ولبس شعب الكنيف العمة وزالت عنه الهمة بعد ما فهم انه مختوم على قفاه... المهم


برضه في يوم جت الحكيمة قالت هنضاعفلكم سرعة التيت ومش هتدفعوا حاجة زيادة، طبعاً شعب الكنيف فرح، ما هو يا عيني غلبان وبينسى بسرعة، ومش فاكر ان الحداية مش بتحدف كتاكيت، والى بتديه باليمين بتاخد قده ألف مرة بالشمال، وفعلاً معداش كام يوم والحكيمة قالت انها هتحدد تنزيل الحجات من على التيت علشان محدش يقدر يدخل يشوف حاجة ولا يعرف ينزل حاجة ولا يفهم حاجة، ما هو أصل في ناس فهمت الفولة، وعملت على التيت مراكز مهولة بتعرض فيها بلاوي مش معقولة، لكن بعد الي حصل، كله هيخاف يزور، ما هو التنزيل محدود وهيخلص في بصة ولا بصتين، خلينا أحسن نتلهي في التشات، ومعاكسة الولاد للبنات، وبلاش الحجات الوحشة... المهم


بس في ناس طلعت وقالت لأ، احنا مش هنقبل خالص، لأ ازاي؟ معقولة دي؟ لا للمحدود الي هياكله الدود، احنا هنقاطع ونمانع وهنقول لوزيز الانفصالات لا يا عمو، وهنفصل نفسنا من كومبانيات التيت ونخسرها... بس حبايبي لسه برضك غلابة ومش فاهمين إن الحكيمة لئيمة لؤم موردش على صحاب المناغير المايلة، ما هو ده يا حبايبي الى هما عاوزينه، عنكم ما دخلتم على التيت من أصله، ده التيت هو الي جايبلكم الكافية وخلاكم تشوفوا الى مش المفروض تشوفوه وتعرفوا الي مش المفروض تعرفوه، كانت شورة مهببة لما دخلنالكم التيت ده، يلا أحسن، بطلوا تخشوا عليه واتفرجوا على القناة اللولا أحسن علشان تشوفوا منزجات الحكيمة الرهيبة المهيبة المعيبة.


وللحديث بقية

[bigboss_215]

أنا رأي نشد السيفون علشان نستريـــــــــــــــــــــح ا ه ه ه ه ه ه ه ه ه

[crypt76]

أنا رأي نشد السيفون علشان نستريـــــــــــــــــــــح ا ه ه ه ه ه ه ه ه ه

نستريح؟ فى جمهورية الكنيف؟ واضح انك من دولة تانية معادية

[mramzi]

رائعة يا هيثم بك

اسلوب جميل غاية في التعبير

في انتظار البقية :ah7:

[SNAKE180592]

حكاية حلوة بس الأحلى أنها تكمل بأن كل مواطني جمهورية الكنيف المعتبرة يقطعوا التيت و يتفرجوا على اللولا لغاية أما جمهورية الكنيف المعتبرة متبقاش معتبرة لما كل الشركات بتاعة التيت تزنق على جمهورية الكنيف من كل حتة لأنها مش ح تستحمل الخساير اللي ح تجرى لها.

[waheed omar]

بجد أللى بيعملوا الناس دى فينا ده كتيييييييير ومش عارف لحد أمتى هنفضل ساكتين على كل حال (حسبنا الله ونعم الوكيل)

[Soteer]

الدوله دي من نسج خيالك 
انت مبتفكرش وبتزعق وخلاص 
فاكر ان الحكومه بتعمل  حاجه ضدك 
الحكومه تعبانه وعملت اكتر مما يمكن انت فكرك انت لو مكان حد من الوز ده كنت عرفت تعمل زيه 
مشكلتنا اننا 20 مليون بنتكلم ومحدش بيعمل حاجه كل واحد بيدور علي نفسه و بس

الي هنا انتهت كلمه السيد زحلقها زحلقه واطلع بيها علي بره ليوكد ان مـــــصــــ - اسف الكنيف - بخير وان -قاه قليله مندسه هدفها تزعزع الامن والامان هي اللي بتعمل كده

وانا من هنا بناشد ال 100 مليون بتوع مـــــصـــ-اسف تاني الكنــــــيف - انهم يعرفوا ان احنا بخير وباذن الله المرتبات هتوصل علي اخر السنه ل 104.53 جنيه وده بعد ضرائب الرفاهيه ما اتشالت عشان اكتشفنا ان فيه ناس تعبانه

--------------------
ملحوظه انا لو حد شافني وانا بكتب المشاركه دلوقتي هيصعب عليه منظرني
وانا كتبت المشاركه بس ومش هكتب تاني هنا او علي الاقل هحاول هاههاهاهاهاهاها

[crypt76]

Soteer، الجزء الأول من التعليق ده مين الى قاله؟

[Soteer]

مش فاكر يا هيثم
بس كان في القاهره اليوم
قبل ما ابطل فرجه علي المسخره اللي بتحصل في البلد
كنت بتابع كل حاجه اما دلوقتي فانا نسيت معاد نشره 9 -متعرفش بتيجي الساعه كام -

[V for Vendetta]

لطفا أ/هيثم crypt
التأثير بدأ يظهر :eek:
يوميات مواطن كُنِّيِفِي مُعْتَبَر

[DR ! ZERO]

أسلوب جميل يا أستاذنا ببوضح كل حاجة كتر خيرك يا راجل يا طيب ...

و يخرب بيت التـــــــــــــــــيت على تــــــــــــيتوه

[b0gy]

انا لسه اول مشاركه فى المنتدى و الموضوع ده فعلا حال الشعب المصري لا هو فعلا الشعب المصري المختوم على القفا

[masklove]

:ah7::p:p:p
احنا نخد لنا يومين اجازة في الصحراء الجرداء لا تيت فيها ولا بلاء وكل حاجة هتبقي كويسة وهترجع تحمد ربك علي شربة الماء:D

[Marine]

بجد اسلوب ممتاز وانا مستني كمالة الحدوتة

[mmwali]

ما شاء الله اسلوبك في الكتابة اكثر من رائع

لو كان عندك عندك اعمال ما (مقالات اوقصص قصيرة او حتي طويلة) يا ريت تدلني عليها

ولو مش عندك اعمل من دلوقتي فعلا عندك موهبة حلوه