إحنا نكمل عربى بقى , علشان النبى عليه الصلاه و السلام عربى و علشان نوفر وقت بس ... ماشى ؟
6- مفيش أى نيه لأى تجدد بإستثناء سماعه الرأس الكرييتف ( د لو جبتها من أساسه ) , لأن الحمد لله مفيش أى فلوس , فضلا عن ان خلاص انا هأبدأ أشوف مصلحتى بقى بعد التخرج ان شاء الله , و هابعد عن الكمبيوتر شويه .
7- أصدقاء بمعنى أصدقاء ؟؟ ....... مفيش !!!
اه و الله مفيش , كل الىل اعرفهم زملاء و بس , إنما صديق و يسأل عليا و أسأل عليه و كلام من ده : لأ مفيش!!!
صديقى الوحيد هو الكمبيوتر حاليا , و طبعا انا لسه متكلم شويه عن صداقات البنات
على فكره , علشان ماحدش يفهمنى غلط برضه , انا ليا زميلات بنات تربطنى بهم علاقات قويه و بإسرهم أيضا نظرا لانى شخص محل ثقه على حد تعبيرهم
يعنى انا مش معقد يا جماعه ولا متخلف ولا الكلام ده ... بس نفسى أكون شخص متمسك بدينى اولا , و باخلاقى ثانيا
8- أعتقد أنسب مكان هيكون مكه المكرمه طبعا , لو ما كنتش من مصر أكيد كنت هأتمنى أكون فى مكان يٌعتبر هو الأقرب للحصول على النجاه
أيوه النجاه , النجاه من شر الدنيا , و من شر الناس
و المكان ده الواحد كان هيكون فيه أكثر مقربه من المقدسات و البيت العتيق
و متهيا لى ان حلم كل مسلم انه يكون فى المكان ده دايما يعنى
و ما تخافش مش هأقول لك : لو لم أكن مصريا لوددت ان أكون مصريا !! :D
9- بص
أنا مش عامل أى خطه لحد دلوقت
لأن فى بلدنا دى انت مش عارف انت رايح فين
و الدليل إنت أهه , شوف انت متخرج من ايه و بتعمل ايه دلوقت
مجالين أغراب عن بعض تماما , و بالتالى فأنا بفكر بشكل قصير المدى
على الأقل دلوقت , ممكن فيما بعد أغير النظام بس ربنا يسهل و أخلص
و عموما الخطط لن تخرج خارج : التدريس , و الكمبيوتر
التدريس أساسيه , و الكمبيوتر خطه بدليه
و ممكن أدمج الاتنين مع بعض , إيه المانع ؟
10- صعب أقول لانى مش متفرج عنده ولاء أوى :D
المهم الاقى حاجه تستاهل انى اضيع وقتى ادامها و بس
عموما البيت بيتك كان هو الأفضل
و فى المسلسلات : حدائق الشيطان طبعا
11- المكرونه بالبشاميل
و الوجبات الثقيله بشكل عام
بحس الاكل المسبك و السمن البلدى
أنا مش نباتى أبدا , و مش بحب معظم النباتات
بحب كمان اللحوم الثقيله : البط و الأوز و خلافه
مش بحب الأسماك ولا الأرانب ولا أى أكله غريبه عن اللى متعود عليه
المشروب المفضل : القهوه ... بستمتع بيها جدا , مع كل رشفه بحس انى طــــــاير
12- الحمد لله
نعم , و بإقتدار :D
شفت لما يقول لك الباور يعمل بكفاءه تصل 80 +
أهو أنا بقى تقدر تقول إنى إن شاء الله هأعمل بكفاءه 90 +
ال 10 - دول ممكن يروحو بسبب ضغوط الشغل و الحياه و الحاله النفسيه و كده , أكيد ممكن تأثر فى مره ولا حاجه
مثلا : مش معقول هأبقى مضغوط فى الشغل مثلا و أجى أقف فى المطبخ
مانا أطلب أكل جاهز و خلاص
:D:D:D:D
13- أول إمبارح
نطقت الشهاده فعلا لأنى إتأكدت إنى هأتخنق و أموت
من كثر الضحك
ضحكت لحد ما حسيت إن عضلات بطنى خلاص هتنفجر
لما كنت عمال أتتريق على أخويا الصغير
و فجأه إنفجرت فى الضحك بدون سبب
14- يا نهــــــــــار أبيض
ولا أى حاجه
كنت هأقول يا خبر أبيض
إيه اللى حصل ده
لا حول ولا قوه الا بالله
الباور تعبان و سبب ان الكارت يضرب
مش كنت تعمل حسابك يا مادى فى باور أكبر
يا أخى حرام عليك تضيع كارت زى ده
هو انت لاقى فلوسه ولا جايبه ببلاش
لا إله إلا الله
قلبى معاك يا حبيبى
ده نصيبك بقى ,,, و خطأ منك برضه
مش كنت تعمل حسابك
لالالا ... أنا زعلنا منك , بقى تضيع الكارت الجديد
ياريتنى ما كنت سمعت كلامك و ركبته
أنت اللى غلطان
لا حول ولا قوه الا بالله
طب بقول لك ايه :
الشاعه بقت 10 أهه و أنا هأتاخر عن المواصلات
شوف لى الطريق يلا و و احنا ماشيين نكلم استاذ هانى
نشوفه ممكن يعمل ايه فى الضمان
ما تبصليش كده
و اوعى تعيط ولا تلوم نفسك
ده نصيبك و انت ما عملتش حاجه
الباور بتاعك هو اللى عمل
يلا يا عم اتحرك شوف الطريق
:D:D:D:D:D
15 + 16
سؤال فى غير محله
بتفكرنى بالملك لير لما سأل بناته بتحبونى أد إيه , و كان السبب فى هلاكه !!
أبى و أمى - حفظهم الله - بيمثلو لى أجلم شئ فى الدنيا
الناس اللى كانو سبب فى مجيئى للدنيا
الناس اللى علمونى الكلام و المشى و الأكل و علمونى كل حاجه
الناس اللى انا واثق و متأكد انهم بيحبونى أكثر من نفسهم
الناس الوحيدين اللى بيتمنونى أبقى أحسن منهم
الناس اللى بيسهرو على راحتى و مش مستنيين مقابل
والدى راجل طيب اوى , نصف متعلم , بيعرف يقرأ و يكتب على خفيف
مزاجه حلو , و دايما بيحب يهزر معانا , مش راجل معقد , ولا ديكتاتور
ولا من الآباء اللى بيعملو تصرفات غريبه
طول النهار شقيان علشاننا , مش حارمنا من حاجه
بنطلب الطلب تانى يوم يكون موجود , رغم الحاله الإقتصاديه الصعبه
مشرفنا دايما وسط الناس بطيبه قلبه و بسمعته الطيبه و أخلاقه الحميده
لا بيشرب , ولا بيسكر , ولا ..... , ولا ...... , فعلا مثال للأب المشرف
أنا فخور بيه جدا فوق ما تتخيل , و بحمد ربنا نهار و ليل انه وهبنى أب كده
عمره ما مد ايده عليا
أمى هى اللى كانت بتتولى مسؤوليه الضرب و إحنا صغيرين
آخر مره انضربت فيها لما كان عندى 8 سنين و كنت بلعب فى الطين ( كنت بصمم عربيات :D ) , أبى و أمى - حفظهما الله - بيحترمونى جدا و مشرفيننى ادام الناس و دايما فخورين بيا و مديينى حق أكثر من اللى انا استاهله
والدى صديقى ؟؟
لا , إطلاقا , ولا والدتى
و مش هأفسر بس هأديك بعض المظاهر :
1-عمر ما والدى جالى المدرسه ....... ولا مره فى حياتى
2- عمر ما والدتى وصلتنى المدرسه ...... ولا مره فى حياتى
3- عمر ما والدى عرف انا فى فصل كام ....... ولا مره فى حياتى
4- عمر ما والدتى سألت عنى المدرسين ..... ولا مره فى حياتى
5- عمر ما والدى سألنى : عامل ايه فى المذاكره ؟
6- عمر ما والدتى سألتنى : إيه أخبار يومك النهارده ؟
السبب يكمن ان هو ده السائد هنا فى بلدنا
الناس فاهمين ان دور الأب و الأم هو الأكل و الشرب و الغسيل على الأم
و المصاريف على الأب ... و على كده
و السبب كمان : إنى انا الحمد لله طول عمرى مشرفهم , و عمرى ما عملت مشكله فى حياتى , فدايما مطمنين من نحيتى
و رغم كده انا شايفهم قامو بدورهم على أكمل وجه و ما قصرو معايا إطلاقا
ربنا يخليهم ليا و يحفظهم و يجازيهم بكل خير فى الدنيا و الآخره
و أتمنى انى اكون دايما عند حسن ظنهم
واتمنى انى اكون مصدر سعاده و فخر لهم دايما
كان نفسى أجاوب بشكل أكثر تفصيلا عن كل الأسئله
بس خلاص ... ظهرى هيتكسر :D:D
على فكره
أديلك جايزه أحسن أسئله
و لك تقييم
اللى بعده ..............
:D:D
المشاركة الأصلية كتبت بواسطة BlacK ShaDoW
المفضلات