>>> كرسى الأعتراف <<<

[The STIG]

كام سؤال كده فى السريع

-انت هندسه قسم ايه ؟
-بتعرف تطبخ ؟ :D
-ايه اكتر حاجه عملتها و ندمت عليها ؟
-لونك المفضل ايه ؟ :D:p
-نفسك تعيش فين فى مصر ؟ وبره مصر ؟
-بتعرف تسوق ؟ لو اه ايه اغبى حاجه عملتها وانت سايق؟:D

راجعلك تانى

[MF88]

MF88

الكلام ملخبط وداخل فى بعضو ليه افصح وابن .... اعمل اقتباس لكل سوؤال وجواب عليه منفرد

انا بعمل كده فى كل الاسئله . مشاركه العضو ALL4US اتلخبطت منى
شويه و هظبطها ان شاء الله

سؤالين كده
ما هى اكتر القنوات الى بتتفرج عليها قنوات عاديه

مبحبش التليفيزيون نهائى . فقط بتفرج على العاشره مساءا او 90 دقيقه
عشان اتابع مصايب مصر

ايه اكترقناة اسلا ميه بتحبها

قناه الرحمه و بتابعها لما يكون الشيخ محمد حسان بيدى درس او حاجه

ماهو شيخك المفضل الى بتحب تسمعلو ومااتملش منو وتشتاق اليه

الشيخ عمر عبد الكافى

ماهو القارىء المفضل ليك وايه اكتر الصور بتحب تسمعها

القارىء المفضل هو الشيخ الحصرى رحمه الله . صوت جميل جداً
و كل السور بحبها مينفعش افرق سوره عن سوره
لكن اكتر اول 3 ايات فى سوره العنكبوت مهمين اوى بالنسبالى

انت محافظ على الصلاة بالزات صلاة الجماعه ولا متقطع

الحمد لله محافظ على الصلاه لكن فى الجماعه مقصر جدا للأسف
بس مش ساكت على كده بزود صلاتى فى الجامع الحمد لله

بتصل اقربائك وبتزورهم ولابتحب العزله فى البيت

الحمد لله بصل اقربائى دايما لكن مبرنش لحد على الموبايلات
لأن الموبايلات " الجوالات , المحمول " جايه للحديث فقط مش الرنات
مع ان فيه ناس كتير من اهلى بيزعلو جدا من كده لكن مش هتغير
بتطمن على اصدقائك من الوقت الى التانى ولا مكبر دماغك

كنت زمان بطمن عليهم دايما لكن بعد فتره معينه فحياتى مبقاش ليا

اصدقاء تقريباً

دى شوية اسئله لما افكرك فى شويه تانين

خدام سعادتك يا فندم . شوف اللى يعجبك و انا تحت امرك

نظام الاجابه كده كويس ؟؟؟ وللا اعدل ؟؟؟

[MF88]

الاسئلة الي جاية ديه يا حوده انتقام من الي عملته فى بن عمي الجوهري

دورك جى ان شاااااااء الله يا خفيـــــــف و هتحصل ابن عمك :D

س1 :
بتعرف تبطخ ؟

لا مبعرفش . لكن امنيه حياتى انى اكون بفهم فكل شىء اعرف اطبخ و اصل الحنفيه و السخان
و اعرف فى شغل البيت و اصلح كل حاجه . ووصل بيا جدّيه الامر انى ادور على النت على دروس
تعليم و مازلت ببحث بصراحه

س2 :
ايه اللون المفضل ليك ؟

اللون اللى بكتبلك بيه ده " البرتقالى :D "

س3 :
نفسك يبقي عندك عربية نوعها ايه ؟

انا بحب الانفراد للأسف فأحب امتلك اى عربيه تكون ببتصنع بالطلب
لكن لو على الحقيقه نفسى فأى عربيه شيك و تكون هاتش باك تقضى الغرض

س4 :
بتعرف تسوق؟ معاك رخصة؟

للأسف مبعرفش و كنت هتعلم فى الصيف لكن محصلش نصيب . ان شاء الله اتعلم و اطلع
رخصه فى الصيف

س5 :
اتعلمت السباحة امتي وفين؟

سباحه مين دى ؟؟؟؟؟ . انا قولت انى بلعب تنس ارضى . مجبتش سيره سباحه خالص

لكن لو على العوم نفسه فأتعلمته اكيد فى البحر . كنت اول 7 سنين فحياتى اقعد على الرمل

و كل اخواتى ينزلو . و اقعد العب فى الرمل لما اشبع . و نروح :D

لحد فمره قولت انا زهقت من الرمل بقى زهيــــــــــقت و روحت ناطط فى الميه

و قولت لو هموت مش طالع للرمل تانى :D:D و دقيقه و اتنين و بقيت بعوم فى طولى

سنه و اتنين بقيت بعوم حتى فى المجارى :D

س6 :
لو هتخرج من المخروبة الي احنا فيها ديه نفسك تسافر فين ؟

بلاد عربيه : الامارات

بلاد اجنبيه : لندن

شهر العسل : جزر الباهاما :D

حفله الطلاق : السيده زينب:D:D:D " بعد الشر عليا طبعاً , حد لاقى سحليه :D "

س7 :
مانوع موبايلك ؟ وليه بتفضل النوع ده عن الباقي ؟

نوع موبايلى NOKIA 5300 EXPRESS MUSIC و بفضله لأنه موبايل زباله و مش عارف انا جبته ليه

:D:D ولا بفضله ولا حاجه بس كان معايا قبله الـ 6600 و كنت متعقد من الصوت الواطى

اول ما شوفت ده بيجلجل قولت باااااااااس والله مانا طالع اللا بيه . و جبته بـ 1300 جنيه ايامها

دلوقتى ميسواش 600 جنيه حتى

س8 :
لو معاك مليون جنيه هتقسمه ازاي بحيث انك تسعد الي حواليك وتلبي مطالبك الشخصية ؟ (اختياري)

10% منهم فقراء و مساكين قبل اى شىء

20% منهم كل اللى محتاج حاجه فى العائله " العائله الكبيره " محتاجها عشان يعيش او

يزوج حد من اولاده هساعده قد ما اقدر ان شاء الله

20 الف جنيه كمبيوتر جديد بكل اللى تتخيله " مش هيكفى برضو انا عارف بس فى حدود الفلوس "

80 الف اسقط فريضه الحج ليا و لأمى

هيتبقى 700 الف اكيد هجيب شقه عشان الزواج بإذن الله و اللى هيتبقى هسيبه للزمن او

للعفش و التجهيز

س9 :
بتفضل Intel or AMD - Nvidia or ATI وليه ؟

ATI OR nVIDIA بفضل الاتنين . عشان اللى يفضل شركه عن شركه يبقى معندوش وعى

اللى هيقدم الافضل و بسعر مُرضى هبقى تبعه على طول الخط . لكن الانحياز ده اسمه تخلف

حضارى . و يسرى الشىء على المعالجات بالنسبالى

س10 :
اكتب مواصفات كومبيوتر أحلامك ؟

CPU : CORE I7 980X
MotherBoard : ASUS RAMPAGE III EXTREME
RAM : 12 GB DDR3 2400 MHZ
3X SSD 512 GB SATA III IN RAID 0
HDD : 2 TB CACHE 128 SATA III
DVD: ASUS 22X
9 DISPLAYS SONY 42" LED ULTRA HD IN EYEFINITY MODE " 3D READY 120 HZ "
GPU : ATI HD 5970 CROSSFIRE_X (DUAL MODE )
PSU : DUAL CORSAIR 1200 WATT
ALIENWARE CASE
COOLER : NOCTUA HD-14 + MX III EXTREME
SOUND SYSTEM : LOGITECH Z5500 5.1 + CREATIVE X-FI ELITE EXTREME
LOGITECH G35 HEADPHONE
LOGITECH GAMING KEYBOARD " LCD SCREEN INCLUDED " + LOGITECH MOUSE
SWEET TABLE TO BARE ALL OF THESE MONEY ON TOP OF IT :D


س11 :
بتحب خلفة البنات ولا الولاد اكتر ؟ (عقبالك كده وعقبالنا جميعا)

الأتنين عندى سواء . لكن احب فى الولد انى اشوفه بيكون راجل قدامى يوم بعد يوم
و البنت احب اشوفها بتضحك و بتملى الدنيا فرحه و تدلع عليا و هى صغيره و تصاحبنى
وهى كبيره

س12 :
كنت بتهرب من المدرسة فى الثانوية ؟ ولو كنت بتهرب , كنت بتروح فين ؟ (متحاولش الانكار - الانكار مش هينفعك - اعترف :D)

عمرى ما هربت اللا مره واحده : كنت رايح مسابقه اوائل الطلبه :p

س13 :
ايه اكتر موقف اتعرض ليه في حياتك وكنت حاسس انك اسعد انسان فى الدنيا ؟

لسه مستنيه

س14 :
قلبك اسود ؟

جدا :D عشان كده هقعدك بعدى على طووووول :ah4:

س15 :
حاسس انك اتظلمت فى المنتدي هنا قبل كده ؟

ولا مره لحد دلوقتى الحمد لله . لكن ممكن اتظلم قدام . الله اعلم ما فى طى الايام

س16 :
لو اتعرض عليك انك تمسك مركز كبير فى منتدي لسه جديد , هتوافق ولا هتفكر ؟

كنت صاحب منتدى يعنى مسكت منتدى من اول ما كنت بسمع فيه صدى صوتى لوحدى
و بعدها كنت مشرف فى 3 منتديات و قررت انى مكونش مشرف بعد كده نهائى

س17 :
كسرت سرعة اي قطعة من قطع جهازك فبل كده , ولو حصل ايه اكبر سرعة وصلتلها ؟

ولا مره . ولا حتى الكارت 5770 . هكسر عند التجديد اذا شاء الرحمن

س18 :
احلي ايام حياتك كانت فترة ايه ؟

سنه تانيه و تالته ثانوى . الصداقه كانت متعه ايامها و كنت بضحك انا و اصحابى لحد ما بطنى
توجعنى . و مفيش مدرس يدخل اللا و نهزر معاه و كان بيحترمنا كلنا لاننا كنا اذكى ناس فى المدرسه

س19 :
بتقرف او بتخاف من حشرات او حيوانات معينة ؟

خوف لا . قرف نعم من الصرصور لو شفته ميت و طالع من بطنه الماده البيضاء دى
ببقى عايز اموت نفسى . لكن وهو صاحى عادى
مره و انا عند واحد صاحبى بجيب كبايه من المطبخ و بنتكلم لقيت صرصار طلع منها و قعد يجرى
على ايدى و كان هيموت و مرعوب حطيت ايدى على الحيطه عشان يمشى و يروح للحيطه
و نجحت الخطه :D بس وهو ماشى حرقه صاحبى بولاعه المطبخ وهو ماشى :D:D

س20 :
نفسك سوق الهاردوير فى مصر يبقي عامل ازاي , وايه الي ناقصه , وانت لو معاك فلوس وهتعمل مشروع للهاردوير ممكن تعمل ايه ؟

من امنياتى و ما زالت من امنياتى بقى معايا 10 مليار دولار فقط عشان تجاره الهاردوير
اول مرحله هجيب كل الكماليات اللى تتوقعها " اللى تستاهل "
و هدخل كل اللى ناقص السوق لكل الفئات
و هخللى هناك عنصر للسرعه . يعنى الفيرمى طلع فى امريكا 1500 كارت منهم
يكونو فى مصر بعد 5 ايام
لكن المرحله دى مش هتطول كتير و هدخل
فى المرحله التانيه : و هى انى اجيب المستثمر الاجنبى على ارض مصر
يعنى اهجيب شركه MSI و تنزل بكل مصانعها هنا تحت اشرافى و كل البورد
و الكروت بتاعتها تتعمل هنا و بعديـــــن اللى بره يبقى يوصلهم مننا
و اهى فرصه نشغل الناس اللى تفهم فى الحاجات دى و فلوس مصر
متضيعش فى الاستيراد و خلاص . و كمان العملات الصعبه هتزيد
و النهارده MSI بكره ASUS , INTEL , AMD و هلم جرّا و ساعتها السوق
هينتعش بطريقه رهيبه . لأن كل السلع بتتصنع محلياً يعنى متشال منها الضرائب
و كمان الناس اشتغلت و العمله زادت . يعنى مكسب من كل النواحى سواء ليا او لأخواتى الشباب

س21 :
ايه احلي حتة فى اسكندرية , وايه اعفن واوحش حته فى اسكندرية ؟

كل بلاد الله حلوه . لكن افضل مكان بالنسبه ليا هو امام البحر
اما الحتت الحلوه كسكن و هاى كلاس منطقه رشدى و كفر عبده و اماكن فى سموحه

اعفن حتت بصراحه معرفش لكن اعفن منطقه زورتها مش فاكر اسمها لكن تحس انك فى
بلد زراعى مش اسكندريه اللى الناس تعرفها

س22 :
لو هتمشي من اسكندرية وهتعزل وتسكن فى حتة تانية تحب تسكن فين ؟

اللى يعيش فى اسكندريه ميقدرش يطلع منها ابداً اللا لو الظروف اضطرته
1- افضل من العاصمه
2- مواصلاتها حلوه بالنسبه للقاهره
3- ملمومه
4- جميله
5- بحرها يجنن و ميزه ملهاش مقارنه

س23 :
ايه الفيلم الاجنبي الي اتفرجت عليه ولحد دلوقتي منغشش في دماغك ومش هتنساه ؟

انا مدمن افلام اجنبى بصراحه . من الافلام اللى بحبها

THE DARK NIGHT
TRANSFORMERS I & II
THE PIRATES OF THE CARIBBEANS TRIOLOGY
BRAVE HEART
ATONEMENT
ENEMY AT THE GATES
PRESTIEGE
MIND HUNTERS
و افلام تانيه كتير جدا

و تقدر تقول انى بتجنن لما بشوف افلام الانيميشن " بعشقها عشق "

و من الافلام الهادفه اوى منها الفيلم CHRISTMAS CAROL الفيلم مأخوذ عن قصه للكاتب
تشارلز ديكتز و قصه حلوه جدا جدا

و بحب اوى الكوميديا فى فيلم KUNG FU PANDA
و فيه افلام تانيه كمان بس مش فاكرها

س24 :
ايه رأيك في ان المرأة تشتغل قاضية ومأذونة و و و و ؟ وانت مع شغل المرأة عموما ولا لا ؟

انا مع المرأه الاجتماعيه . و ليست العامله الأنثى عامه شىء لدن
مع اى تأثير بتتشكل بشكل يصعب انه يعود لشكله الاصلى
لما تاخد على الشغل انسى انها تقعد ولو قعدت هتكونلك مبوزه
لما تتعود على الاحتكاك الكلامى مع الرجاله بتتأثر بطبعهم و افعالهم فوقت معين
هتلاقى اخوك نايم جنبك على السرير و فيه احتماليه يضربك و ابسط دليل على كده
ان بعد فتره من الشغل تلاقيها بتقول قرشى و قرشك و الكلام الاهبل ده
طبعا هيجى حد يقوللى انت لو حنين عليها و بتديها كل اللى تحتاجه عمر ده مهيحصل
اقولك روح استغطى و نام عشان متتعبش
الست بمجرد متاخد فلوس من شغلها بتحس ان لازم يكون ليها كيان منفصل
وبيجلها جرأه غريبه جدا . ربنا يهدى

س25 :
لو تحب تسألني سؤال دلوقتي , تحب تسألني تقولي ايه ؟ (دا انا بحبك يا حوده , اوعي تعملها فيا :ah32

امتى حسيت انك مش قادر تقاوم المعاصى و الذنوب " البس يا معلم فى الحيط:D "

س26 :
5x5 بكام ؟ (خارج المنهج :D)

اللى اعرفه ان فيه 4X4 الشيروكى . هم نزلو الموديل الجديد و انا معرفش :D
اعتقد الـ 5X5 ممكن تكون بـ 630 الف وللا حاجه:D:D هى out of stock مش خارج المنهج:p

كفاية كده لحد كده

والبقية تأتي بس علشان عايز انام

الأجابة تكون نموذجية ومن الكتاب والا هتشيل المادة الخمس سنين الي جايين

انا بقولك اهوه

هم كانو 20 سؤال بس

بس قولت لا دول شوية علي حوده حبيب الملايين قولت لازم نكرم الضيف شوية ولا يقول علينا بخلاء

حبيبي والله :D

انا ابن ....... انى فكرت اعمل الموضوع ده :D

[MF88]

!!!!!!!!!
ولسة في بقية كمان !
ده محمود ليلته سودا النهادره شكله :ah32:

شوفت يا ابنى . ده الاعدام بيكون دقيقه و اقلب

ده يدوم مفعوله ايااااااااااام و ايااااااااااااااام :D

[MF88]

- سؤال محرج جدا لميم فوزى.

- مين هو أكتر عضو خنقك بالأسئلة. :D

- لازم تجاوب بصراحة ، أى تهرب هيخلينى أحطلك لسته أسئلة بالهبل. :ah32:

لحد لدوقتى لسه مجاش ابن الحلال
ههههههههه

:rolleyes:

[spidermohmd1]

عايزين صورة ليك يا محمود

و متخفش , صورتك مش هتهتز في عقليتنا :D

[MF88]

بدايتا اهلاوى ولا زملكاوى وعجبك الى حاصل دة من الشحن ؟

حلوووووووو " نص اسئلتك هتطلع Out لأنى مليش فى الكوره نهائى :D

لو طلعلك بطاقة انتخابية هترشح مين فى الرئاسة ؟

هرشح : اللواد الدكتور / محمود محمد فوزى ابو بكر الشافعى و اسم الشهره " MF88 " هنتتخبنى ؟:D

مشترك فى كام منتدى وما هو الاكثر دخولا لة بعد عرب هردوير ؟

مشترك فى كتيـــــر و من كترهم مش فاكرهم . الاكثر دخولا بعد عرب هاردوير حاليا هو NONE

اية اللعبة الى انتة بتلعبها على الكمبيوترواية اللعبة الى على البلاى استيشن اكيد كورةبس برخم ؟

اللى بلعبها على الكمبيوتر حاليا هى MW2 -ZUMA 2007 -MOST WANTED - MOHAA البلاى ستيشن
مبجيبش العابه

من هو اكثر الاعضاء بتحس انة ملخبط فى كلامة يعنى مش بتفهم منة حاجة خالص ومواضيعة غريبة جدااااااا؟

فيه عضو جديد اسمه OPEN بستغرب من طريقه وضعه للمواضيع و بستغرب و بتنرفز من الناس اللى
مبتعرفش تاخد قرار . شويه يقول هجيب 5770 و بعد 3 ايام ادخل الاقيه بيقول و الكارت السافاير 5850 الاقيه قين
بقى ؟؟؟ و الناس كلها تدخل ترد تانى يوم . مين يا ترى احسن شركه بقى للـ 5770 ؟؟؟ و مقلتوش رأيكم فى
الـ 5850 كمان ؟؟؟ ببقى نفسى ادخل من الشاشه اضربو المين و ارجع

اكمل ولا اية
لا بلاش
لا اكمل
ولا اقولك اكمل عشان انا رخم :D

كمل يا رخم :p

امامك مينا هتقولة اية امامك الاستاذ حميدو هتقولوا اية امامك شلاع العتر هتقولة اية انا ادامك هتعمل اية فية :D؟

مينا هقوله : انت فى 80% فى كلامك صح بس متزنش على الناس كتير سيب اللى يقتنع يقتنع واللى مش عايز
براحته . و هقوله دمك خفيــــــــف موووت و
I CAN'T WAIT TO MEET U PERSONNALLY
" يعنى بحب مصر بالعربى :D "

الدكتور حميدو : هقوله زادك الله علماً و خُلقا و ربنا يباركلك فى رجل الكهف:D

الاستاذ شلاع : هقوله لا تكتفى بالمشاهده طويـــــلاً و لا تخف من ان يُعيب عليك جاهل فالأُسودُ اسودُ
و الكلابُ كلابُ

انت قدامى : هفضل اضغطك لحد ما تبقى فى حجم البروسيسور :D هجيبلك الضغط يعنى :D:D

مين اكتر عضو بيضحكك ومن اكتر عضو بيخليك تحزن ؟

اكتر عضو بيضحكنى كلام مينا . خصوصا لما يكون الاعضاء متقبلين ذلك " بيبدّع " :D

اكتر عضو بيخلينى احزن هو العضو اللى مبيشوفش . او العضو اللى يفضل الحديد عن الصديق . و مش هشرحها

مين صاحبك هنا ومن الى نفسك تعرف صورتة؟

اصدقائى هنا كتير الحمد لله . لكن اقربهم ليا هو" محمد هالكى"

اكمل ولا لسة اكمل ولا اية تتوقع اية اكيد هكمل دة انت حبيبى

من ايام الجيزه ؟؟؟؟ :D

عارف هيما event 88 وعارف المطحون هيما مين فيهم تعرفة اكتر ~؟ اية السؤال الرخم دة بس انا كتبتة وخلاص مش همسحة :D

ايه السؤال ده :D

مين هنا فى المنتدى عاوز تمسكة وتضربة ومين نفسك تديلوا هدية ممكن تقول عشان انا عاوز اعرف اصلى عوزك تبقا مبسوط كدة وشجاع

عايزنى ابقى مبسوط ؟؟؟ و افرفش اكده و ازجطط :D

عايز اضرب كل واحد متردد زى مقولت قبل كده

نفسى ادى كل واحد يفيد المنتدى و يفيدنى هديه

ما هو اكتر مسلسل بتتفرج علية ما هو احسن فيلم شفتة فى حياتك اية الكرتون الى انت بتحبة مش لازم دلوقتى ممكن زمان

المسلسلات اللى شوفتها

PRISON BREAK
HEROES
FLASH FORWARD

الاخير افضلهم بالنسبه لى " مسلسل ملوش حل "


هبقا افتكر شوية وااقولك

تفتكر مين الى هيفوز بالدورى ومين الى هيفوز بابطال اوروبا :confused:

ما هى احسن قناة مصرية رياضية محاية مفيهاش حجات كدة ولا كدة ... بتحب علاء صادق وبتحب خالد توحيد ومدحت شلبى وطاهر ابو زيد ومحمد الليثى ؟ سؤال رخم فحت

مليش فى الكوره :D ( اجابه رخمه طحن :p ) لو منك اعيط :D

انا رخمت عليك جامد كام رخامة وخلاص

طولك كام عمرك اد اية ما هو تاريخ ميلادك (عوزين نقولك كل سنة وانت طيب)

طولى 169 او 171 فى الحدود دى . عيد ميلادى 19 فبراير 1988 و انت طيب يا خويا :ah3:

عاوز صورة شخصية ليك

قبل النوم قول محمود فوزى 30 مره و هتحلم بيا فيديو HD و هتشوف بقى رخامتك هتوصلك لفين فى الحلم:D

متنساش تاكل CODECS قبل ما تنام عشان الصوره تكون SMOOTH

لو عجبتك ابقى خدنى سكرين شوت :D:D

اية رأيك فى رخم ولا رخم

هتعرف رأيى فى الحلم :D

[MF88]

تقصد مين يا عم فادى .. بالراحه عليا ... متسخنهوش ..
------

وبالانتظار يا حوده ..انا ناوى اخليك تنطقها وتقول اقفلوا الموضوع .. .! هيهات ..<:D

لا متخفش لو قلتها مش هكتبها فى رد عشان من اللى شوفته واضح ان الشماته هتبقى على

YOUR EYE يا تاجر :D:D

[MF88]

كام سؤال كده فى السريع

واحد اتنين تلاته .... 7 وشوش مبتسمه ياراجل ؟؟؟؟ متاخدهم عامل مشترك :D

-انت هندسه قسم ايه ؟

هندسه قسم مدنى . اى عماره عايز توقعها اتصل بـ 0900 و هتلاقينى جى بالعربيه
-بتعرف تطبخ ؟ :D

ولا حتى بيض مسلوق:D بس نفسى اتعلم
-ايه اكتر حاجه عملتها و ندمت عليها ؟

انى استمريت فى كليه الهندسه
-لونك المفضل ايه ؟ :D:p

اللون اللى بكتب لحضرتك بيه " اللون الخضر اكيد :D "

-نفسك تعيش فين فى مصر ؟ وبره مصر ؟

فى مصر انا مبسوط اوى فى اسكندريه الحمد لله . بره مصر الامارات او بلد اجنبى محترم زى لندن

او كفر فرنسا

-بتعرف تسوق ؟ لو اه ايه اغبى حاجه عملتها وانت سايق؟:D

لسه هتعلم ان شاء الله . و اغبى موقف هيحصللى انى هــ ..... لسه معرفش :p

راجعلك تانى

خد زيرو بالعجله و تعالى تانى :D

[HaMsiK]

قبل النوم قول محمود فوزى 30 مره و هتحلم بيا فيديو HD و هتشوف بقى رخامتك هتوصلك لفين فى الحلم:D

متنساش تاكل CODECS قبل ما تنام عشان الصوره تكون SMOOTH

لو عجبتك ابقى خدنى سكرين شوت :D:D



بطني وجعتني من الضحك ولله دم خفيف يا محمود:D:D

[MF88]

عايزين صورة ليك يا محمود

و متخفش , صورتك مش هتهتز في عقليتنا :D

متأكد ؟؟؟؟ ماشى يا سيدى

و ادى صورتى




انتظر صوره اخرى بعد ما اظبط شعرى :D:D:D

صورتى اتهزت فى عقليتك ؟؟؟ و لا عقلك جاله زلزال ؟؟؟ :D

[MF88]

قبل النوم قول محمود فوزى 30 مره و هتحلم بيا فيديو HD و هتشوف بقى رخامتك هتوصلك لفين فى الحلم:D

متنساش تاكل CODECS قبل ما تنام عشان الصوره تكون SMOOTH

لو عجبتك ابقى خدنى سكرين شوت :D:D



بطني وجعتني من الضحك ولله دم خفيف يا محمود:D:D

الله يخليك يا عمر باشا :D

[spidermohmd1]

يا عم قول أنك مكسوف تحطها و هعديهالك .. لكن متعدش تقولنا بعد كدة قاهر الأسئلة و مسبتش سؤال :D

و عقابا ليك سؤال كمان :p

مين أكثر شخص حاسس أنك ظالمه و بتزعله و بعديها ضميرك بيأنبك و يقول يعني فيها أيه لو كنت كلمته كويس ... ؟

[MF88]

يا عم قول أنك مكسوف تحطها و هعديهالك .. لكن متعدش تقولنا بعد كدة قاهر الأسئلة و مسبتش سؤال :D

و عقابا ليك سؤال كمان :p

مين أكثر شخص حاسس أنك ظالمه و بتزعله و بعديها ضميرك بيأنبك و يقول يعني فيها أيه لو كنت كلمته كويس ... ؟

انا

[The STIG]

واحد اتنين تلاته .... 7 وشوش مبتسمه ياراجل ؟؟؟؟ متاخدهم عامل مشترك :D

:D:D:D

سؤالين فى السريع كده :
-مين العضو اللى حيقعد على الكرسى بعدك ؟
-ايه اول 5 اسماء بعدك فى اللسته بتاعتك (ومتتهربش من السؤالين دول:D:D)