إخواني الأعزاء ..
السلام عليكم ورحمة الله ..
كان يا ماكان في قريب العصر والأوان، وفي لحظة من لحظات الجنان !!
قررت إني أحدث جهازي مع إنه كان أكثر من كافي
بس من كثر مطالعاتي على العديد من المراجعاتي عملتلي " كـــالو " في دماغي وزرعتلي فكرة في إحساسي ، إني لو ما حدثتش المرة ديه، الفلوس هاتضيع في الأكلات والفسحاتي، والجيمز هاتسوق في المتطلباتي، وفجأة هلاقي جهازي، زي المتشرد في الحــواري ، لا عنده صاحب يواسي واللا مطرح بيستر ويداري ..
كفاكم الله شر الجنان ..
المهم ، روحت نزلت أوام ، وجيبت الجهاز الهمام، وفرحت بيه فرحة العرسان ، وبنشاط شديد عملت الفك والتركيب، بس وانا في وسط الفرحة ، قابلتني مفجأة ! إيه هي المفجأة ؟ طلع كبل من كابلات الباور قصير ، ومش هينفع يلف من ورا البوردة !!
طب ليه لازم الففه؟ ما أخذه دغري وعلى طول أثبته ؟ ده بالظبط إللي أنا عملته ، وطلعت النتيجة زي ماهي باينة في الصورة دية :

وزي ما إنتو شافيين ، وأكيد إنتو واعيين ، إن الكابل اللي لونه إسود مريّح على "البـاشـا" كرت الشاشة ، ومعدي بكل غلاســة من ورا المشتت وبيمنع الهوا يعدي بكل سلاسة ، وأحب أقول ملاحظة وجيهة ، إن الموضوع ده ماحصلش مع البوردة القديمة مع إن الكيسة والباور كانوا همّا همّا.
البوردة القديمة كانت : Ep45-ud3r الله يمسيها بالخير مطرح ما كانت .
والبوردة الجديدة هي : Ga-x58a-ud3r ربنا يخليها ليا ..
قولو آمين ..
إللي يحب النبي يقول آمين ..
آمين يا رب العالمين ، والف صلاة وسلام عليك يا حبيب المؤمنين..

المهم ، فضل الحال بالشكل ده ، وبعد ما سألت ده وده ، ودورت في أماكن متعددة ، ظهرت المعجزة!!
عثرت في منتدانا الغالي ، على عرض خيالي ، ولا كان على بالي ! لقيت أخ من اخواني في المنتدى بيبيع وصلة باور بمقبس ثماني !! آه يا فرحتي في زماني !! قمت على طول أتصلت بيه في السريع ، قبل ما الفرصة تضيع ، ويحصل الأمر المريع !!
والحمد لله وبفضل الله ، إشتريت الوصلة المصونة ، وهي زي ما هي باينة في الصورة :



أنا سامع حد بيسألني: طب ليه إنت صورتها وجنبها خمسة جنيه ؟
- هي طبعا مش بخمسة جنيه ، وانا صورتها كدة عشان تعرفوا إنها كانت بالظبط بالشكل ده !
واللي عايز يعرف أكثر من كدة عليه إنه يضغط هنــــا ...

وأحب أقوللكم إنها طلعت وصلة أصيلة ، أسلاكها تخينها وشديدة وشكلها حلوة ومليحة ، وجاكاتها قوية ورصينة ، بصراحة وصلة محترمة لا فيها لخلخة ولا تعرف الشخلعة ..
والحمد لله تم تركيب الوصلة، وبقى الحال بالشكل ده :

وأخيرا أحب أشكركم على مروركم ،
والسلام عليكم ورحمة الله ..