السلام عليكم ورحمه الله وبركاته
عملت الموضوع ده لأن فيه شواهد و علامات وضحتلى إن فيه ناس مش مستوعبه المجله بشكلها الصحيح
انا لن أتكلم عن المقالات التى تصلنى - أو آرائكم بالمجله حتى الآن - لكن سأتناول الموضوع بشكل مختلف
و لن اتكلم بالعربيه الفصحى كثيراً عشان متفتكروش انه بيان إدارى لا سمح الله :D
المفروض المجله تقدم إيه لكل شخص ينوى تحميلها ؟
قبل ما اقول المجله تقدم إيه - لازم أقول المجله دى تستهدف مين
فيه مجلات تستهدف مهندسين فقط و مجلّه تستهدف الأطفال فقط و مجله تستهدف من يهوى السياسه وهكذا
مجله عرب هاردوير تستهدف جميع الأعمار - و جميع الفئات من أول شخص بيعرف يقرأ و يكتب - إلى العلماء
و من أول الطفل ذو الـعشره سنوات إلى الرجل الكهل ذو 90 عاماً ( إذا كان لسه فيه صحه يعنى )
طيب كيف تستهدفهم ؟ بتصوب عليهم و هتقتلنا جميعاً يعنى وللا ايه :confused: ؟
هدف المجله الرئيسى تثقيف الناس و إطلاعهم عن كل جديد له علاقه بالهاردوير و الإلكترونيات و للأسف
الناس فهمت بشكل خاطىء إن الهاردوير يعنى بروسيسور - كارت شاشه - صندوق - كيبورد . الموضوع
ممكن يشمل حتى مشترك الكهرباء و كيفيه إختياره و سماعات الموبايل و الأنظمه الصوتيه و أجهزه التليفون الأرضيه
حتى سلك النت اللى بنشتريه من الكهربائى - الموضوع يشمل حاجات أكتر وهو مدى تغلغل التقنيه و الإلكترونيات
بشكل عام فى أنظمه الدوله السياسيه و طرق إدخال البيانات الحديثه
المجله ممكن تتناول حاجات كتير مثل HINTS عن كيفيه إستخدام الفيس بوك أو تويتر - ممكن كمان تتكلم
عن تاريخ التقنيه و تتناول دروس مبسطه عن إختيار الكاميرا المناسبه مثلا
الموضوع أكبر و أوسع بملايين المرّات من اللى انا لاحظت إن الناس معتقداه . و فيه ناس بتقولى عايزين نعرض
مراجعه لكارت شاشه فى المجله
المجله يا جماعه المفروض ان كل شخص بيكتب يبقى حاضر فى ذهنه والدته - أخته - جيرانه و يعرف هم مش مستوعبين إيه فى الإلكترونيات و يكتب عنه - حتى لو اختيار نوع الراوتر
متزعلوش منى لو قولتلكم إن الناس مبقتش تفكر فحاجه غير بطريقه المنتدى
- مراجعه الكارت الفلانى
- الشركه الفلانيه عايزه تحول عضويه عبد السميع اللميع عضويه تجاريه
- البروسيسور ده أدؤه إيه فى الطىّ
- عايزين زرار شكر
- عايزين نكبر التوقيع
- عايزين نعمل موضوع مجمع لكل تعريفات كروت ATI من أول ما عملو الجيل الرابع لحد جيل الثوره
طيب لحد إمتى هنفضل مهتمين بـ 3 أو 4 قطع ؟؟؟؟ لحد إمتى هنفضل نكتب للناس عن كارت الشاشه و المعالج
و المشتت و الحاجات دى بس ؟مع العلم أن بقى هناك معمل مراجعات خاص بالحاجات دى يعنى ده مش إختصاص المجلّه الأساسى ولكنه مُساعد
طيب نوصل إزاى للناس اللى معندهاش نت ؟ أو متعرفش تتعامل مع منتديات ؟؟
الإجابه فى كلمه وحيده وهى " المجله "
انا طبعاً عارف ان الناس فيه كتير منهم هتقول الجمله دى (( عشان مسك المجله بقى جى يقول المنتدى أى كلام - ده محمود ده شخص غريب - أكيد أخد الأوردر انه يكتب الكلمتين دول أه ياعينى مهو عبد المأمور - سيبوه ياكل عيش يا جماعه - ..... ))
الحقيقه انا مش جى أكل عيش ................................. لأنى عامل دايت :D
انا مش بكتب الموضوع ده بتوجيهات .......................... لأن رئيسى المباشر لما كنت مدير التحرير كان محمد إبراهيم و محدش كان ليه أى تعليق على شغلى أنا وهو نهائى و نتاج المجله خاص بينا إحنا الإتنين فقط
انا مش شخص غريب :D ............................... انا شخص weird
سبب كتابه الموضوع فى الحقيقه هو إنى عايز الناس تكتب عن حاجات كتير ومش شرط كارت شاشه أو معالج أو ذواكر أو لوحه أم بس
ممكن طبعاً تكتب فى الهاردوير لكن أنت ككاتب قدامك الحياه كلها ليه متفهمش الناس و توعيهم بمقال صغير
انا مش عايزك تكتب صفحه جرايد كلام - المقال المفروض يتميز بالبساطه و وسطيه الحجم و الشرح فيه يكون قليل
لأننا مش بنصْدر كتاب شروحات - لكن مجرد توجيه للناس و اللى عايز يستزيد يبقى يتفضل مشكورا بزياره البورتال و المنتدى
يعنى حتى الآن فيه ناس متعرفش تدخل على الفيس بوك ولا تستخدمه - لو إتعملت سلسله شروحات مبسطه
تصدر فى كل عدد حلقه يبقى ممتاز
فى مصر كام أم عندها كمبيوتر و متعرفش تستخدم الياهو عشان تكلم أولادها المسافرين بالخارج ؟ فين المقاله
اللى تسد تلك الثغره ؟ وللا عايزينها تقرأ عن أفضل مراجعه للشهر :confused: هتقولك انا عامله صينيه مسقعه:ah5: أما اروح اشوف اللى ورايا .... ما تتفضلو معانا ؟؟؟
لكن لو تناولت مقال يغطى إحتياجاتها من الكمبيوتر ساعتها هتطفى على المسقعه و تقرأه و مش مهم أبو العيال بقى:ah32: :D
دورى الوحيد هو إنى أوضح المجالات الكتير جدا اللى المفروض الناس تكتب فيها - أكيد مفيش مجله رئيس
تحريرها و النايب بتاعه :D هم اللى بيتكبو كل مقالاتها
لكن المجله دى ملك الجميع و مسموح للجميع انه يكتب فيها و يعبر عن رؤيته الخاصه للهاردوير و الإلكترونيات بشكل عام
magazine@arabhardware.net
كل شخص يكتب مقال يتفضل مشكوراً بإرسال مقالته على الإيميل السابق و هتكلم فى الفقره القادمه عن شويه حاجات تساعدك و إنت بتكتب المقال
المفروض أنى ألون كل كلمه و أهتم بالتنسيق ؟
- لأ , كل اللى عليك تعمله أن كل عنوان رئيسى بالمجله يكون مكتوب فى الوسط من المقاله و بخط أكبر من بقيه المقال و يا سلام لو يكون بلون مختلف و إبعد عن الألوان الفاتحه قوى عشان المصمم يقدر يشوف ( مع العلم ان التنسيق الكتابى فى المقال مش هو
ده اللى هيطلع بالضبط فى المجله و هنا دور المصمم )
- هل لازم أدرج صور فى المجله و انا اللى أصمم المقال زى ما بيطلع فى المجله ؟
بالنسبه للصور لو المقال هيحتاج لصور حط الصور اللى تعجبك ( و يفضل تكون كبيره شويه - مش FULL HD ولا صغيره زى THUMBNAIL الصور يعنى )
ثانيا تصميم المجله ده بيكون خاص بالمصمم و ده تم تعيينه من قبل شركه عرب سوفتوير عشان يقوم بالأعمال
التصميميه بشكل كامل - فقط ضع الصور بالمقال و هو هيصممها حسب ذوقه و زى ما بتشوفوها فى الأعداد السابقه
هل هناك ميعاد لتسليم المقالات ؟؟؟؟؟ وهل هناك ضوابط لكتابه المقالات بشكل عام ؟
لو ناوى تلتزم بسلسه مقالات - يبقى لازم تسلم بأكملها مره واحده عشان يلحق المصمم يشتغل عليها و كمان لو حصل أى ظرف لا قدر الله المجله متطلعش ناقصه بسبب أى ظرف
لو مقالات منفرده - يبقى فى أى وقت وهنضعها سواء فى العدد الحالى أو اللى بعده أو حسب ما تراه إداره تحرير المجله
و الميعاد الأفضل لتسليم المقالات هو أول اسبوع من كل شهر
لانه بيدينا مساحه كافيه للتعديل على التصميم و تصحيح الأخطاء الإملائيه فيه و حاجات كتير ( المقال بيكون مخدوم كويس يعنى )
و بالمرفقات الملف الرسمى المتفق عليه من إداره تحرير المجلّه لشروط كتابه أى مقال و أى إخلال بها يكون المقال مرفوض
أخيراً الموضوع ده هيفضل موجود عشان أتلقى فيه إقتراحاتكم و آرائكم للمجله و إزاى نطورها و كمان رأيكم فى كل عدد يتم إصداره
لأن المجله من غير المحررين مش هتبقى مجله - و كمان مينفعش تكون حكر على رئيس تحريرها و النايب بتاعه :D
و كل من لديه فكره عن باب جديد للمجله أو مقال معين يتفضل بكتابته هنا
و الإيميل السابق ذكره فقط لإستقبال المقالات وليس لأى شىء أخر
بالـتوفيــق
المفضلات