تجربتى مع اللاب توب DELL INSPIRON 5220

**osamamo** · 28-06-2013, 14:40

السلام عليكم

انا اشتريت اللاب توب دة بقالى 4 ايام اهو وعاوز اقولكم على التجربة

طبعا مش حاسس بنفس الحرية الى كنت بحسها مع الـ PC حاسس انى متقيد
الكيبورد مش بتنور وانا بحب اقعد فى الضلمة

ودى سببتتلى مشكلة
مشكلة تانية الكيبورد قريبة اوى من الماوس التاتس تحتها بالظبط يعنى وانا بكتب ممكن ايدى تنزل وتخبط في البتاعة التاتش دى وتلخبطلى الكلام او المؤشر يروح لحتة تانية

اللاب مش معاة تعريفات
ومش معاة نسخة ويندوز "بس هو علية ويندوز اصلة جاى بية"

اللاب بيسخن جامد "لآزم المروحة تفضل شغالة عشان تحس انك عادى تمام "

طبعا انا مش عارف اغير ويندوز علشان خايف الويندوز الاصلى دة يروح والتعريفات تضيع

اللاب فية من فوق 3 ازرار مش عارف وظيفتهم

واحد علية مربع وجانبة نجمة وواحد علية حرف زى W كدة مش عارف بتاع اية دة برضو واخر واحد دة بتاع الاعدادات ودة دوست علية وطلع نافذة كدة فيها اختيارات مفيدة

اللاب فية زرار علية FN مش عارف دة بتاع اية برضو

طبعا اللاب سريع وجميل جدا

هو تقيل شوية بس عادى " العب حديد علشان تقدر تشيلة

"

طبعا مش علية اى العاب والهارد فاضى بس كدة

اتمنى تقولولى رأيكم

**arsenal_henry** · 29-06-2013, 01:15

مبروك عليك اللاب .. واللابات دايماً مش مريحة في حتة الكتابة على الكيبورد وعايزة تعود شوية ..
بالنسبة لنسخة الويندوز ولو مش عايز تضيعها، اعمل Recovery يعني تعمل نسخة احتياطية منها لو حصل حاجة ترجعها علطول وفي موضوع مثبت هنا في القسم في شرح الموضوع ده ..
لو عايز تعرف وظيفة الزراير ايه كاملة هتلاقيها في الكتالوج manual اللي جاي مع الجهاز ..
تحياتي وبالتوفيق ..

**Ḿǿĥâmeḋ Ấḅḑ Ệlậẑiz** · 29-06-2013, 04:01

رجاء احتفاظ بنسخة Recovery للاحتفاظ بالتعريفات الاصلية و الويندوز ايضا
بس سؤال بس ...هو الجهاز ازاى جاى من غير اسطوانة تعريفات ؟؟!!
حضرتك اشتريت من شركة ايه ؟؟!!

**osamamo** · 29-06-2013, 06:52

الله يبارك فيك

شكرا على ردك

بخصوص ال manual مش مفيد خالص ومش علية اى معلومات كلها تحذيرات وارشادات الامان وفية كل اللغات ورا بعض الا العربى

وعلشان كدة مش عارف الاقى حل ومش عارف الاقى المعلومات الكافية

**osamamo** · 29-06-2013, 06:56

شكرا على ردك

انا اشتريت اللاب من السعودية مش من هنا وبعد كدة عرفت من واحد صديقى ان كل اللاب توبات الحديثة مش بتيجى معاها اسطوانات
بس ضرورى تلاقى بارتيشن علية النظام بشكل خفى

انا مش عارف بقى الاقى البارتيشن ازاى وكمان اللغة العربى فى الويندوز انا مش متعود عليها ومش عارف اندمج مع النظام بسرعة

**arsenal_henry** · 29-06-2013, 13:47

عشان تغير اللغة .. ادخل على control panel وبعدين clock,language and region .. واختار التبويب keyboards and languages .. هتلاقي حاجة اسمها display language .. وغير اللغة الموجودة من العربي للانجليزي ولو ملقيتش الانجليزي هيبقى لازم تعمل update من فوق من على النت من خيار install languages ..