بسم الله الرحمن الرحيم
مراجعتي للكيسه HAF 922
الكيسه دي متوفره في مصر بسعر 750 جنيه فقط عند ماكسيمم هاردوير باقي الناس بتبيعها ب 800 جنيه
كتير منكم يعرفوا اني كان عندي انتك 900 فطبيعي اول حاجه تيجي في دماغي هو المقارنه بينهم انا اول ما فتحت الكيسه و شفت المنظر ده للمعدن الفضي اللامع قلت ايه ده !! ده معدنها زي الكيسات التعبانه غير الانتك 900 زي ما في الصوره دي
لكن اول ما بدات التركيب و التعامل مع الكيسه لقيت غير كده خالص المعدن بتاعها سميك جدا و متين جدا و اقوي من الانتك 900 في بعض المناطق الضعيفه اصلا زي مطرح ما بيركب البراكت بتاع المزربورد اللي كان لازم ادعمه بايدي في الانتك 900 عشان ميتنيش مني !!
نيجي بقي للكيسه نفسها طبعا واضح من الصوره اللي فاتت انها اوسع كتير من الانتك 900 و تركيب الحاجه فيها سهل جدا و دي صوره للهارد و هو متركب في الكيج بتاعه
و علي عكس نظام تثبيت الهارد الممتاز فان نظام تثبيت السواقات ال 5.25 بوصه فاشل 100% و ده احد عيوب هذه الكيسه بس ده ممكن يكون راجع اني مش متعود او مش عارف استخدمه صح عموما امكانية التثبيت العادي بمسامير موجوده و افضل للثبات في رايئ
تركيب الحاجه في مكانها كان سهل جدا و مفيهوش اي مشاكل و الكيبل مانجمنت في الكيسه دي ممتاز و اكثر من رائع و دي صور للكيبل مانجمنت من الخلف اللي مستخبي
و من الامام بعد انتهاء تركيب الحاجه مفيش عيب فيه غير قصر كابل ال8 بن بتاع البورده عشان كده معرفتش الفه من ورا بس ده عيب من الباور مش الكيسه (يا ريت لو حد شاف كبل التطويل اللي كان بياسل عليه لؤي فايز يقولي ضروري لو سمحتم )
نيجي بقي لنظام التهويه
1-مروحه 20 سم من الامام باضاءه حمراء ممكن تشغيلها و طفيها من زرار اعلي الكيسه
2-مروحه 20 سم من اعلي لطرد الهواء الساخن و مفيهاش اضاءه
3-مروحه 12 سم في الخلف
ده الحاجات اللي جت معاها و صوتهم هادي جدا بالمناسبه
اللي انا ركبيته
4-عدد 2 مروحه 12 سم في الباب الجانبي و دول خلوا الاتهويه اكتر من ممتازه و افضل كثيرا من الانتك 900 زي ما حنشوف في صوره درجات الحراره
5-هما قايلين ان ممكن تركب مروحه 12 سم او 14 سم في قعر الكيسه بس لما حاولت لقيت انه مينفعش غير مروحه 140 سم بس !!
تعديل واجب المروحه 12 سم ممكن تركب عادي جدا في القعر بس انا اللي مكنتش شايف خروم التثبيت كويس و عامله فرق مذهل في درجات الحراره و ده اللي حتشوفوه في الصوره التانيه بعد تركيب المروحه
و دي درجات الحراره قبل تركيب مروحه القعر
و دي درجات الحراره بعد تركيب مروحه القعر و زي ما انتم شايفين درجات الحراره نزلت في متوسط 4-8 درجات !!
الكيسه دي مذهله في التبريد !!!
مميزات الكيسه (من وجهة نظري )
1-واسعه جدا (معلش سبايدر معنديش متر بس واضح من الصور انها ممكن تشيل اي كرت شاشه حتي 5870 مستريح مع العلم ان في امكانية خلع كيج الهاردات تماما و تركيب الهارد فوق مع الدي في دي)
2-معدن ممتاز و بنيه قويه جدا
3-نظام تهويه هادي جدا و قوي جدا جدا
4-تصميم خارجي اكثر من رائع
5-امكانيه التحكم في الاضاءه الاماميه
6-نظام التثبيت للهاردات و الكروت محكم و سهل جدا
7-مخرج Esata في وش الكيسه
8-امكانية تركيب مشتتات البروسيسور الضخمه حتي 16 سم طول و بدون الحاجه لفك البورده
عيوب الكيسه (من وجهة نظري)
1-معهاش مسامير كفايه
2-نظام التهويه مفيهوش كل المراوح اللي مفروض تركب
3-نظام تثبيت الدي في دي
4-عدم وجود كابل Esata لاستخدامه مع المخرج لكن يبدو انهم بيعتمدوا علي توفره مع البورده !!
5-استخدام اجزاء بلاستيك في مناطق كان يفضل تبقي معدن
التقييم العام 8.5 من 10 للعيوب السابقه
اسيبكم بقي مع شوية صور بعد الانتهاء من التركيب و التشغيل
صوره في الظلام للنور الامامي
واي استفسار او سوال او تعليق انا تحت امركم باذن الله
المفضلات